Qazaqstan men Ózbekstan azamattarynyń ózara saparyna arnalǵan talaptar jeńildeıdi

<p>ASTANA. KAZINFORM &mdash; Búgin Senattyń jalpy otyrysynda &laquo;2000 jylǵy 7 shildedegi Qazaqstan Úkimeti men Ózbekstan Úkimeti arasyndaǵy Azamattardyń ózara saparlarynyń sharttary týraly kelisimge ózgerister engizý týraly hattamany ratıfıkatsııalaý týraly&raquo; Zańy maquldandy.</p>

Atalǵan Hattamaǵa Memleket basshysynyń Tashkent qalasyna sapary aıasynda 2022 jylǵy 22 jeltoqsanda qol qoıyldy. Ózbekstan jaǵy hattamany byltyrdyń sáýir aıynda ratıfıkatsııalady. Zańnyń maqsaty - eki memleket arasyndaǵy dostyq qarym-qatynastardy odan ári damytý, azamattardyń saparlaryn retteý, sondaı-aq bir memleket azamattarynyń ekinshi memlekettiń aýmaǵynda bolýy úshin qolaıly jaǵdaılar jasaýǵa quqyqtyq negizdi odan ári jetildirý.

«Hattamada Kelisimniń birqatar baptarynyń jeke tarmaqtary, Kelisimniń qosymshalary jańa redaktsııada jazylyp, keıbir baptar alynyp tastaldy. Olardyń ishinde negizgi ózgerister Kelisim Taraptary azamattarynyń ekinshi memleket aýmaǵyna kirý jáne onda bolý merzimin retteıtin 2-shi bapqa engizilip otyr. Qoladanystaǵy 2-bapqa sáıkes, eki memlekettiń azamattary ekinshi Tarap memleketiniń aýmaǵyna 5 táýlikke deıin tirkeýsiz keledi jáne onda bola alady. Hattamaǵa sáıkes, eger azamattardyń bolý kezeńi Tarap memleketiniń memlekettik shekarasyn kesip ótken kezden bastap kúntizbelik 30 kúnnen aspasa, quzyretti organdarda tirkeýsiz olardyń aýmaqtarynda bolýynyń ońtaılanǵan tártibi engizilip otyr. Osylaısha, Hattamada azamattardyń ekinshi Tarap memleketiniń aýmaǵynda bolýynyń merzimi ýaqytsha tirkeýsiz 5 kúnnen 30 kúnge deıin ulǵaıtylyp otyr», - dedi senator Qaırat Tastekeev.

Hattamada qarastyrylyp otyrǵan kelesi ózgeris – ol ekinshi tarap memleketiniń aýmaǵyna kelý kezinde Taraptar memleketteriniń (Qazaqstan men Ózbekstan) azamattaryna shekaralyq qyzmet beretin jáne ketý kezinde qaıtarylýǵa jatatyn kóshi-qon baqylaý kartochkalaryna baılanysty normalardyń alynyp tastalýy.

«Osy ózgeristerden keıin, azamattar kelesi Tarap aýmaǵyna Hattamanyń qosymshalarynda tizbesi bekitilgen jeke basyn kýálandyratyn jáne azamattyǵyn rastaıtyn qujattar negizinde kiredi, odan shyǵady, tranzıtpen ótedi, júrip-turady. «Qazaqstan Respýblıkasynyń halyqaralyq sharttary týraly» Zańyna sáıkes Hattama ratıfıkatsııalaýǵa jatady», - dedi depýtat.

Óz kezeginde Senat tóraǵasy Máýlen Áshimbaev Qazaqstan men Ózbekstan arasynda berik baýyrlastyq qarym-qatynas qalyptasqanyn atap ótti.

«Memleketter qol qoıǵan máńgilik dostyq týraly jáne odaqtastyq týraly sharttar sonyń aıqyn dáleli. Búgin qaralǵan hattama eki el azamattaryna ózara saparlaryn júzege asyrýda qosymsha ońtaıly quqyqtyq jaǵdaı ornatady. Maquldanǵan zań tatý kórshilik qarym-qatynasty odan ári nyǵaıtýǵa óz úlesin qosady dep senemiz», - dedi Senat tóraǵasy.