Qazaqstan men Ózbekstan arasyndaǵy taýar aınalymy 1 mlrd dollardan asty
19:48, 04 Mamyr 2022
NUR-SULTAN. QazAqparat - Qazaqstan Premer-Mınıstri Álıhan Smaıylov Ózbekstan Úkimetiniń basshysy Abdýlla Arıpovpen telefon arqyly sóılesti. Bul týraly QazAqparat Úkimettiń baspasóz qyzmetine silteme jasap habarlaıdy.
Áńgimelesý barysynda taraptar ekijaqty qarym-qatynasty tereńdetýdiń, onyń ishinde ózara saýda kólemin arttyrýdyń, ónerkásiptik kooperatsııa men sý sharýashylyǵy salasyndaǵy yntymaqtastyqtyń ózekti máselelerin talqylady.
Álıhan Smaıylov osy jyldyń birinshi toqsanynyń qorytyndysy boıynsha eki el arasyndaǵy taýar aınalymy $1 mlrd asqanyn, bul ótken jyldyń sáıkes kezeńindegi kórsetkishten 27%-ǵa joǵary ekenin atap ótti.
Sondaı-aq taraptar «Ortalyq Azııa» halyqaralyq ónerkásiptik kooperatsııa ortalyǵyn iske qosý sekildi buǵan deıin qol jetkizilgen ýaǵdalastyqtardy júzege asyrý máselelerin qarady.