Qazaqstan men Ózbekstan arasyndaǵy ózara taýar aınalymyn $10 mlrd-qa deıin ulǵaıtý kerek - Álıhan Smaıylov

TAShKENT. QazAqparat - Qazaqstan Premer-Mınıstri Álıhan Smaıylov Ózbekstan Premer-Mınıstri Abdýlla Arıpovpen Tashkentte ótip jatqan ekijaqty yntymaqtastyq jónindegi Úkimetaralyq komıssııanyń 20-otyrysy qarsańynda kelissóz júrgizdi, dep habarlaıdy QazAqparat QR Úkimetiniń baspasóz qyzmetine silteme jasaı otyryp.

Taraptar qazaq-ózbek ózara is-qımylynyń birqatar ózekti máselesin, onyń ishinde saýda, ónerkásip kooperatsııasy, ınvestıtsııalyq qyzmet, energetıka, logıstıka, transshekaralyq sý nysandaryn paıdalaný, mádenı-gýmanıtarlyq baılanystardy nyǵaıtý jáne t.b. salalardaǵy birlesken qadamdardy talqylady.

Álıhan Smaıylov Ózbekstan elimizdiń saýda salasyndaǵy iri seriktesteriniń biri ekenin aıtyp ótti. 2022 jyldyń qorytyndysy boıynsha ekijaqty taýar aınalymy josparlanǵan $5 mlrd-qa jetti.

«Bul ortaq kúsh-jigerdiń arqasynda múmkin bolyp otyr. Endi alǵa qoıylǵan joǵary deńgeıdegi mindetterge sáıkes orta merzimdi perspektıvada ózara taýar aınalymynyń kólemin $10 mlrd-qa deıin ulǵaıtý kerek», — dedi Qazaqstannyń Úkimet basshysy. Sonymen qatar Á. Smaıylov qazaq-ózbek Úkimetaralyq komıssııasynyń ekijaqty ózara is-qımyldyń keń aýqymdy máselelerin sheshýdegi erekshe rólin atap ótti.

Óz tarapynan Abdýlla Arıpov eki el arasyndaǵy strategııalyq áriptestikti odan ári nyǵaıtý úshin áleýettiń zor ekenin aıtty.

«Ózara saýdada oń dınamıka baıqalady. Ekonomıkanyń kóptegen salasynda ónerkásip kooperatsııasynyń mańyzdy jobalary iske asyp jatyr. Ózbekstan saýda, energetıka, kólik, aýyl sharýashylyǵy men sý sharýashylyǵy jáne basqa da salalardaǵy yntymaqtastyqty odan ári nyǵaıtýǵa nıetti. Jalpy biz baýyrlas Qazaqstanmen aradaǵy qarym-qatynasty odan ári tereńdetýge múddelimiz», — dedi Abdýlla Arıpov.