Qazaqstan men Ózbekstan arasynda qandaı birlesken jobalar iske asýda

NUR-SULTAN. QazAqparat – Qazaqstan men Ózbekstan arasyndaǵy 2021 jylǵy qańtar-sáýirde ekijaqty taýar aınalymy $1,2 mlrd qurady. Bul týraly QR Premer-Mınıstri Asqar Mamın Qazaqstanǵa jumys saparymen kelgen Ózbekstan Respýblıkasynyń Premer-Mınıstri Abdýlla Arıpovpen kelissóz barysynda aıtyldy, dep habarlaıdy QazAqparat

Qazaqstan men Ózbekstan arasyndaǵy tabysty ónerkásiptik kooperatsııanyń bir mysaly birlesken jobalar – Qostanaı qalasyndaǵy «Chevrolet» markaly avtomobılder óndirisi, Túrkistan qalasyndaǵy tigin fabrıkasy, Shymkent qalasyndaǵy toqyma fabrıkasy jáne t. b. bolyp tabylady. Qazirgi ýaqytta medıtsınalyq buıymdar (Shymkent q.), avtoklavty gazobeton (Tashkent oblysy), «SAZ» markaly avtobýstar (Qostanaı q.), «HOWO» júk avtomobılderi (Saran q.), «Hyundai» markaly avtomobılderdi qurastyrý (Úrgenish q.), as úı plıtalary men sý jylytqyshtar (Túrkistan q.) óndirisi sııaqty birlesken jobalar iske asyrylýda.

Eki el arasyndaǵy áýe qatynasyn keńeıtý aıasynda aǵymdaǵy jyly 8 maýsymnan bastap «Ózbek áýe jelisi» Almaty men Samarqand qalalary arasynda jolaýshylar áýe tasymalyn bastaıdy, al bıylǵy 21 maýsymda «Fly Arystan» qazaqstandyq kompanııasy «Túrkistan – Tashkent» baǵyty boıynsha turaqty reıster ashady. Ózbekstan — Qazaqstannyń Ortalyq Azııa óńirindegi negizgi saýda seriktesi — ÓR úlesi QR-nyń Ortalyq Azııa elderimen syrtqy saýdasynyń 65%-ǵa jýyǵyn quraıdy. 2021 jylǵy qańtar-sáýirde ekijaqty taýar aınalymy $1,2 mlrd qurady, bul ótken jyldyń sáıkes kezeńindegi kórsetkishten 41,3%-ǵa jáne 2019 jyldyń alǵashqy tórt aıynyń kórsetkishinen 33,3%-ǵa joǵary. 2020 jyly Ózbekstanda qazaqstandyq kapıtaldyń qatysýymen kásiporyndar sany 809-dan 919 kompanııaǵa deıin ósti. Qazaqstanda ózbek kapıtalynyń qatysýymen kásiporyndar sany 1231-ge jetti.