Qazaqstan men Ortalyq Azııa elderiniń taýar aınalymyn 15 mlrd dollarǵa jetkizý qajet - Toqaev

NUR-SULTAN. QazAqparat – Qazaqstan men Ortalyq Azııa elderiniń taýar aınalymyn 15 mlrd dollarǵa jetkizý qajet. Bul týraly QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Kópjaqty ózara is-árekettiń myǵym ekonomıkalyq bazasyn qalyptastyrý ózekti mindet bolyp qala beredi. Sońǵy jyldary bul baǵytta aıtarlyqtaı nátıjege qol jetkizildi. Sońǵy 5 jyldyń ishinde Qazaqstannyń Ortalyq Azııadaǵy ózge eldermen taýar aınalymy 42 paıyzǵa artyp, 6,3 mlrd dollarǵa jetti. Ózara saýda-sattyqty ulǵaıta túsý úshin mol rezervtiń bar ekenin eskere otyryp, kóz jeterlik keleshekte bul kórsetkishti múmkindiginshe 15 mlrd dollarǵa deıin jetkizý qajet», - dedi Qazaqstan Prezıdenti Ortalyq Azııa memleketteri basshylarynyń IV Konsýltatıvtik kezdesýinde.