Qazaqstan men Ortalyq Azııanyń taýar aınalymy 7,7 mlrd dollarǵa jetti

<p>ALMATY. KAZINFORM &mdash; Qazaqstan men Ortalyq Azııa arasyndaǵy taýar aınalymy 7,7 mlrd dollarǵa jetti. Bul týraly 13-shi Ortalyq Azııa saýda forýmy barysynda QR saýda jáne ıntegratsııa vıtse-mınıstri Qaırat Tórebaev aıtty.</p>

«2023 jyly Qazaqstan men Ortalyq Azııanyń taýar aınalymy 7,7 mlrd dollarǵa jetti. Aldaǵy 5-10 jylda saýdany eki esege arttyrýdy kózdep otyrmyz. Atap aıtar bolsam, Ózbekstanmen 10 mlrd dollarǵa, Qyrǵyzstanmen 3 mlrd dollarǵa, Tájikstanmen 2 mlrd dollarǵa kóbeıtemiz. Bul úshin osyndaı forýmdar qajet», - deıdi ol.

Qaırat Tórebaev kún tártibindegi birqatar ózekti máseleni atap ótti.

«Ózderińiz biletindeı, Ortalyq Azııa elderi teńizge shyǵa almaıtyndyqtan, aımaqishilik saýda úlken ról atqarady. Saýda – kez kelgen eldiń ekonomıkalyq damýynyń negizgi faktorlarynyń biri. Munda qatysýshylar qaǵazsyz saýdany, jumsaq jáne dástúrli ınfraqurylymdy, elektrondy kommertsııany talqylaıdy, sonymen qatar elder boıynsha belgili bir taqyryptyq sessııalar bar», - dedi Qaırat Tórebaev.

Negizgi nazar saýda-ekonomıkalyq ózara is-qımyldy jáne tranzıt-kóliktik salasyndaǵy yntymaqtastyqty tereńdetýge aýdaryldy.

Ortalyq Azııa elderi sońǵy eki onjyldyqta aıtarlyqtaı ilgerileýshilikke qol jetkizdi jáne óte jaqsy ósý áleýetine ıe. Ótken 20 jyl ishinde óńirdiń jalpy ishki ónimi (JІÓ) jyl saıynǵy ortasha eseppen naqty mánde 6,2 paıyzǵa keńeıip, 347 mlrd AQSh dollaryna jetti. 2000 jyldan bastap syrtqy saýda 7 ese ósti. 

2022 jyly Ortalyq Azııa elderiniń birikken ımporty men eksporty shamamen 190 mlrd AQSh dollar boldy.