Qazaqstan men OPEK munaı óndirisin shekteý kelisimin uzartýdy talqylaıdy

ASTANA. QazAqparat - Qazaqstan 30 qarasha kúni Venada ótetin OPEK+ elderiniń kezdesýine qatysýǵa nıetti, dep habarlaıdy QazAqparat tilshisi.

Kezdesýde 2018 jyldyń sońyna deıin munaı óndirisin shekteý týraly kelisimdi uzartý máselesi talqylanbaq.

«Eger densaýlyǵym múmkindik berse (aýyryńqyrap turǵanyn aıtty), kezdesýge barǵym keledi. Qazaqstan (kelisimdi uzartý máselesin) talqylaýǵa nıetti», - dep jaýap berdi QR Energetıka mınıstri Qanat Bozymbaev jýrnalıster suraǵyna.

Eske sala ketsek, munaı eksporttaýshy elderdiń munaı óndirisin shekteý týraly ýaǵdalastyǵy 2018 jylǵy naýryz aıynyń sońyna deıin óz kúshinde. Kelisimge sáıkes, OPEK elderi munaı óndirisin táýligine 1,2 mln barrelge deıin, al OPEK-ke músheliginen tys memleketter - 558 myń barrelge deıin qysqartýy tıis.

Qazaqstan bıligi munaı óndirisin táýligine 20 myń barrelge deıin qysqartýǵa mindetteldi.

Buǵan deıin Qanat Bozymbaev Qazaqstannyń óz mindettemelerin atqaryp kele jatqanyn málimdegen edi. Sonymen birge, Qazaqstannyń OPEK kelisiminen birtindep shyǵyp, munaı óndirisi kólemin arttyrýy da ǵajap emes.