Qazaqstan men Ońtústik Koreıa $1,5 mlrd-tyq 5 jańa ınvestıtsııalyq jobany belsendi túrde pysyqtaýda

<p>QR-nyń Premer-Mınıstri Álıhan Smaıylov pen Ońtústik Koreıanyń saýda mınıstri An Dok Gyn jańa birlesken ınvestıtsııalyq jobalardy júzege asyrý máselelerin talqylady, dep habarlaıdy <a href="https://kaz.inform.kz/" target="_blank" rel="noopener">Kazinform</a> Úkimettiń <a href="https://primeminister.kz/kz/news/kazakstan-men-ontustik-koreya-zhalpy-kuny-15-mlrd-tyk-5-zhana-investitsiyalyk-zhobany-belsendi-turde-pysyktauda-26027" target="_blank" rel="noopener">resmı saıtyna</a> silteme jasap.</p>

Kezdesý barysynda Premer-Mınıstr Qazaqstan Respýblıkasynyń Úkimeti Ońtústik Koreıamen saýda-ekonomıkalyq yntymaqtastyqty odan ári damytýda úlken perspektıvalar kóretinin atap ótti. Atap aıtqanda, buǵan taýar aınalymynyń serpindi ósýi dálel: byltyr ol 2,3 ese ósip, $6,1 mlrd-tan asty, al bıylǵy jyldyń 8 aıynda taǵy 11%-ǵa artty.

Foto: primeminister.kz

«Ózara saýda nomenklatýrasyn keńeıtý úshin birlese is-áreket etý kerek dep sanaımyn. Bul jerdegi mańyzdy qural – Qazaqstan-Koreıa saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa. Aldaǵy ýaqytta onyń jumysyn jandandyryp, kezekti otyrysyn ótkizý qajet dep oılaımyn», — dedi Álıhan Smaıylov.

Sondaı-aq ol Ońtústik Koreıa elimizdiń ekonomıkasyndaǵy iri ınvestorlardyń top-10-dyǵynyń qatarynda ekenin atap ótti. Atap aıtqanda, sońǵy 18 jylda Qazaqstanǵa $9,2 mlrd-qa jýyq ınvestıtsııa tartylǵan. Al byltyr Koreıadan kelgen tikeleı ınvestıtsııanyń jalpy kólemi 85%-ǵa ósip, jańa rekordtyq – $1,5 mlrd-qa jetti.

Foto: primeminister.kz

Premer-Mınıstrdiń sózinshe, qazirgi ýaqytta elimizde 700-den astam koreıalyq kásiporyn jumys isteıdi, olardyń ishindegi iri kompanııalar – KIA, Hyundai, Samsung jáne LG.

«Búginde jalpy quny $1,5 mlrd bolatyn 5 joba júzege asyrýǵa daıyn jáne jalpy quny shamamen $500 mln-dyq taǵy 25 perspektıvalyq joba ázirlenýde. Aıqyn mysal retinde, Qostanaıdaǵy jylyna 70 myń avtokólik óndirýge qýaty bar, ınvestıtsııa kólemi $190 mln jańa iri KIA zaýytynyń qurylysyn ataýǵa bolady», — dedi Álıhan Smaıylov.

Foto: primeminister.kz

Ol Qazaqstan Úkimeti aldaǵy ýaqytta da ınvestorlardyń elimizde jaıly jumys isteýi úshin barlyq qajetti jaǵdaıdy jasaıtynyn aıtty.

Óz kezeginde An Dok Gyn Ońtústik Koreıa Qazaqstanmen ekonomıkanyń ártúrli salasy boıynsha belsendi tehnologııalyq yntymaqtastyqqa daıyn ekenin atap ótti.

«Qazaqstandaǵy KIA zaýyty sııaqty jobalardyń mańyzy zor. Eger ol sátti júzege asyrylsa, Qazaqstannyń avtomobıl ónerkásibi úlgige aınalmaq. Bul basqa da osyndaı zaýyttar men óndiristerdiń qurylysyna yqpal etedi», — dedi Ońtústik Koreıanyń saýda mınıstri.