Qazaqstan men Mońǵolııa sottalǵandardy ózara berýge ýaǵdalasty

NUR-SULTAN. QazAqparat – Qazaqstan men Mońǵolııa Sottalǵan adamdardy berý týraly shartty ratıfıkatsııalaý týraly gramotalarmen almasty, dep habarlaıdy QazAqparat QR Syrtqy ister mınıstrligine silteme jasap.

«Qazaqstan Respýblıkasy Syrtqy ister mınıstriniń birinshi orynbasary Shahrat Nuryshev pen Mońǵolııanyń Qazaqstandaǵy Elshisi Lýasan Battýlga 2018 jylǵy 29 naýryzda Qazaqstannyń elordasynda jasalǵan Qazaqstan Respýblıkasy men Mońǵolııa arasyndaǵy Sottalǵan adamdardy berý týraly shartty ratıfıkatsııalaý týraly gramotalarmen almasty.

Osy Sharttyń 21-babynyń 1-tarmaǵyna sáıkes, ol ratıfıkatsııalaý gramotalarymen almasqan kúnnen bastap otyz kúnnen keıin kúshine enedi», - delingen mınıstrlik aqparatynda.

Sondaı-aq málim etilgendeı, taraptar ekijaqty yntymaqtastyqtyń ózekti máselelerin talqylap, COVID-19 indeti tóńiregindegi ahýal turaqtalǵannan keıin birqatar mańyzdy is-sharalardy ótkizýge ýaǵdalasqan.