Qazaqstan men Mońǵolııa ózara saýda-sattyqty damytý jónindegi memorandým jasasty

ASTANA. QazAqparat - «Atameken» ulttyq kásipkerler palatasynda Mońǵolııanyń ulttyq saýda-ónerkásiptik palatasynyń ókilderimen kezdesý ótti, dep habarlaıdy QazAqparat palatanyń baspasóz qyzmetine silteme jasap.

Ulttyq kásipkerler palatasynyń qoldaýymen Qazaqstan-Mońǵolııa arasynda saýda-sattyq qatynastaryn damytýǵa baǵyttalǵan memorandýmǵa qol qoıylǵan. Іs-sharaǵa «Atameken» QR UKP Basqarma tóraǵasynyń orynbasary Eldar Jumaǵazıev, Mońǵolııanyń Ulttyq saýda-ónerkásip palata tóraǵasy Magvan Oıýýnchımeg, «Atameken» QR UKP Óńirlik damý departamenti, Qazaqstannyń Syrtqy saýda palatasynyń ókilderi jáne Mońǵolııanyń delegatsııasy qatysty.

Ulttyq kásipkerler palatasynyń Basqarma tóraǵasynyń orynbasary Eldar Jumaǵazıev kezdesýde áriptesterin palatanyń jumys isteý baǵyttary men qurylymyn delegatsııaǵa tanystyryp ótti.

«Birlese jumys jasaý Qazaqstan men Mońǵolııa úshin paıdaly bolatyndyǵynda kúmánimiz joq. Tikeleı teńizge shyǵý joly eki el úshin de múmkin emes, degenimen, qandaı salada ózara tıimdi jumys isteýdi qolǵa alý qajettiginiń búge-shigesine deıin talqylap, anyqtaý qajet», - dedi Eldar Jumaǵazıev.

Ulttyq kásipkerler palatasy tóraǵasy orynbasarynyń aıtýynsha, Mońǵolııamen seriktestik qatynastar ornatý aýyl sharýashylyq ónimderin daıyndaý, organıkalyq taza ónimder shyǵarý salalarynda tıimdi bolatyny anyq.
 

«Bizdiń basty maqsatymyz - qarym-qatynas ornatý. Qysqa merzim ishinde bizdiń usynysymyzdy qabyl alyp, seriktestik ornatýǵa kelisim bergendikterińizge qýanyshtymyz. Eki el úshin tıimdi naqty jobalardy qolǵa alyp, ekonomıkamyzǵa úlken úles qosatynymyzǵa senimdimiz», -  dedi Mońǵolııanyń Ulttyq saýda-ónerkásip palata tóraǵasy Magvan Oıýýnchımeg.

Aıta keterligi, 2016 jyly eki memlekettiń arasyndaǵy taýar aınalymy 77,9 mln dollary bolǵan. Sol jyly Qazaqstannyń Mońǵolııaǵa eksporty 44%-ǵa ósken.