Qazaqstan men Meksıka birqatar salada ekijaqty kelisimder jasaıdy

ASTANA. QazAqparat - Qazaqstan men Meksıka birqatar salada ekijaqty kelisimder jasaıtyn bolady. Bul týraly búgin Aqordada QR Memlekettik hatshysy Gúlshara Ábdiqalyqova senim gramotasyn tapsyrǵannan keıin BAQ ókilderine Meksıka Qurama Shtattarynyń Elshisi Bernardo Kordova Tello aıtty, dep habarlaıdy QazAqparat.

«Kesheli-búgin Qazaqstannyń bılik ókilderimen kezdesýler ótkizdim. Meksıka men Qazaqstan arasynda yntymaqtastyq durys jolǵa qoıylyp, saıası suhbattastyq joǵary deńgeıge kóterilgen degen ortaq pikirge keldik. Meksıka úshin Qazaqstan óz óńirindegi energetıka, munaı-gaz, ýran boıynsha kóshbasshy el sanalady. Qarýsyzdaný, ıadrolyq qarýdy taratpaý, klımattyń ózgerýimen kúres, qorshaǵan ortany qorǵaý syndy máselelerde de elderińizdiń basymdyǵy óte zor»,- dedi ol.
 

Sonymen qatar Elshi eki eldiń arasyndaǵy ekonomıkalyq, saıası jáne mádenı salalardaǵy baılanystardy jandandyra túsý qajettigine nazar aýdardy.

«Aǵymdaǵy jyldyń sońynda deıin atalǵan salalarda tyǵyz jumys isteýge múmkindik beretin birqatar zańdyq qujattardy qabyldaımyz dep oılaımyn. Bul turǵyda biz energetıka, mádenıet salalarynda kelisimge qol qoıýǵa ýaǵdalastyq. Buǵan qosa, taǵy 2 kelisimshartqa qol qoıý úshin jumys isteıtin bolamyz. Onyń biri ekijaqty ınvestıtsııalardy qorǵaý máselesine arnalady. Ekinshi kelisim qosarlanǵan salyqty boldyrmaýǵa baılanysty»,- dedi Bernardo Kordova Tello.