Qazaqstan men Lıýksembýrg Syrtqy ister mınıstrleri vıza máselesin talqylady

ASTANA. QazAqparat – Premer-Mınıstrdiń orynbasary – Syrtqy ister mınıstri Murat Nurtileý men Lıýksembýrg Uly Gertsogtiginiń Syrtqy jáne eýropalyq ister jónindegi mınıstri Jan Asselborn eki el azamattary úshin vıza rejımin jeńildetý máselesin talqylady, dep habarlaıdy QazAqparat tilshisi.

«Eki el arasyndaǵy mádenı-gýmanıtarlyq baılanystyń órisin keńeıtý perspektıvalary aıtarlyqtaı dep sanaımyz. Osy oraıda, biz búgin mártebeli qonaǵymyzben eki el azamattarynyń ózara erkin qatynaýyna jaǵdaı týǵyzý úshin vızalyq máselelerdi de talqyladyq. Lıýksembýrg azamattary basqa eýropalyqtarmen qatar Qazaqstanǵa týrıstik nemese iskerlik vıza rásimdemeı kele alady. Bul jerde ádiletti bolýymyz kerek sııaqty. Shengen kelisimine Lıýksembýrg aýmaǵynda qol qoıylǵanyn eskerip, Asselborn myrzadan Eýropa Odaǵymen Qazaqstan azamattary úshin vızalyq rejımdi lıberalızatsııalaý máselesi tóńireginde bastalatyn resmı konsýltatsııaǵa qoldaý kórsetýdi suradym. Jalpy, Lıýksembýrg bizdiń eýropalyq ınstıtýttarmen dıalogymyz aıasynda «qoldaýshylarymyzdyń» biri bolyp qala beredi dep senemiz. Onyń ústine, mundaı qurylymdardyń bir bóligi Lıýksembýrgtiń ózinde ornalasqan», - dedi mınıstr kelissózden keıingi brıfıngte.

Sonymen qatar Murat Nurtileý Asselborn myrzaǵa kelissóz barysynda saıası dıalogty, saýda-ekonomıkalyq jáne mádenı-gýmanıtarlyq yntymaqtastyqty keńeıtýge degen Qazaqstan nıetin qoldap, ony eki el úshin ortaq maqsat dep qýattaǵany úshin alǵys aıtty.

«Mınıstr Asselbornmen tyǵyz jumys isteýge daıyn ekenimdi rastaımyn jáne ekijaqty qarym-qatynasty jańa deńgeıge kóterýge birlesip kúsh salatynymyzǵa senimdimin», - dedi ol.