Qazaqstan men Lıýksembýrg kólik jáne ǵarysh salasynda yntymaqtastyqty keńeıtpek

ASTANA. QazAqparat – Kólik pen ǵarysh keńistigin beıbit maqsatta zertteý jáne paıdalanýda Qazaqstan-Lıýksembýrg yntymaqtastyǵyn kúsheıtýdiń áleýeti zor. Bul týraly Premer-Mınıstrdiń orynbasary – Syrtqy ister mınıstri Murat Nurtileý Lıýksembýrg Uly Gertsogtiginiń Syrtqy jáne eýropalyq ister jónindegi mınıstri Jan Asselbornmen kelissózden keıin aıtty, dep habarlaıdy QazAqparat tilshisi.

«Saýda-ekonomıkalyq yntymaqtastyqty ári qaraı damytý biz úshin baılanystardy damytýdyń tıimdi draıveri. Sondyqtan, biz oǵan erekshe kóńil bólemiz. 2022 jyly alys-berisimiz 2,5 ese ósse, bıylǵy qańtar-sáýir aralyǵynda taýar aınalymy 4,5 ese artty. Kelissózde aıtylǵandaı, bul qolda bar potentsıaldyń sharyqtaý shegi emes. Sáıkesinshe, biz birigip jańa múmkindikter izdeýge kelistik. Naqty toqtalsam, Lıýksembýrg Saýda-ónerkásip palatasynyń Qazaqstanǵa saparyn uıymdastyryp, onyń barysynda ózara múddelik tanytatyn baǵyttardy ortaǵa salmaqpyz. Qazaqstan tarapy naryǵymyzǵa kirýge nıetti Lıýksembýrg kompanııalary úshin qolaıly jaǵdaı jasaýǵa, daıar ónimderdi syrtqy naryqqa birge shyǵarýǵa daıyn», - dedi mınıstr lıýksembýrgtik áriptesimen kelissózden keıingi brıfıngte.

Sondaı-aq, ol Eýropanyń iri júk áýe kompanııalarynyń biri «KargoLıýks» Astana halyqaralyq áýejaıy arqyly Eýropa - Azııa baǵytynda reıster ashýy ortaq kúsh-jigerdiń jemisi ári bolashaqqa senim uıalatatyn oqıǵa ekendigin basa aıtty.

«Osylaısha, biz Qazaqstannyń batys pen shyǵysty baılanystyratyn kópir retindegi áleýetin taǵy da aıqyn kórýdemiz. Sonymen qatar, kólik pen ǵarysh keńistigin beıbit maqsatta zertteý jáne paıdalanýda Qazaqstan-Lıýksembýrg yntymaqtastyǵyn kúsheıtýdiń áleýeti zor. Búgin atalǵan salalarǵa tıisti qujattarǵa qol qoıyldy», - dedi Murat Nurtileý.