Qazaqstan men Lıýksembýrg áýe qatynasy jıiligin arttyrýǵa ýaǵdalasty

ASTANA. QazAqparat – Qazaqstan men Lıýksembýrg áýe qatynasy jıiligin kóbeıtýge kelisti. Bul týraly Lıýksembýrg Uly Gertsogtiginiń Syrtqy jáne eýropalyq ister jónindegi mınıstri Jan Asselborn Premer-Mınıstrdiń orynbasary – Syrtqy ister mınıstri Murat Nurtileýmen kelissózden keıin aıtty, dep habarlaıdy QazAqparat tilshisi.

«Bizdiń ekijaqty qatynasymyz joǵary deńgeıde qalyptasyp otyr. Bul bizdiń kópjaqty formattaǵy yntymaqtastyǵymyzda da anyq baıqalady. Biz Qazaqstannyń naqty jan-jaqtylyqqa baǵyttalǵan syrtqy saıasatyn qurmetteımiz. Jáne de munyń álemdegi problemalardy sheshýdiń jalǵyz tásili ekenin túsinemiz», - dedi Jan Asselborn kelissózden keıingi brıfıngte.

Mártebeli meıman kelissóz barysynda ózara túsinistik týraly memorandýmǵa qol qoıylǵanyn atap ótti.

«Ulttyq kólik kompanııamyz – «KargoLıýks» Qazaqstan arqyly Qytaıdan Lıýksembýrgke júk jetkizetin bolady. Bul – Eýropadaǵy eń úlken ári jalǵyz kompanııa. Sondyqtan da biz reıs sanyn 7-den 12-ge deın arttyp, júk aınalymyn ulǵaıta alamyz. Munyń bári bir apta ishinde oryndalady», - dedi ol.