Qazaqstan men Lıtva Transkaspıı marshrýtynyń áleýetin talqylady

ASTANA. QazAqparat – Lıtva Syrtqy ister mınıstri Gabrıelıýs Landsbergıspen ótken kelissóz kezinde Transkaspıı halyqaralyq kólik marshrýty men Klaıpeda portyn paıdalaný máselelerine kóp kóńil bólingen. Bul týraly QR Premer-Mınıstriniń orynbasary – Syrtqy ister mınıstri Muhtar Tileýberdi BAQ aldynda jasaǵan málimdemesinde aıtty, dep habarlaıdy QazAqparat tilshisi.

«Zań shyǵarýshy bılik ókilderiniń deńgeıinde eki eldiń mazmundy ózara is-qımylyn atap ótkim keledi. Elimizdiń Parlamenti men Seımde dostyq toptary jumys isteıdi. Investıtsııalyq jáne saýda-ekonomıkalyq yntymaqtastyq máselelerine, sondaı-aq logıstıkalyq joldardy ártaraptandyrýǵa, onyń ishinde Transkaspıı halyqaralyq kólik marshrýtyn (THKM) jáne Klaıpeda portyn paıdalaný máselelerine kóp kóńil bólindi», - dedi QR Syrtqy ister mınıstri.

Onyń aıtýyna qaraǵanda, Lıtva Qazaqstannyń Eýroodaq elderindegi eń iri saýda seriktesteriniń ondyǵyna jáne álemdegi eń iri jıyrma seriktestiń qataryna kiredi.

«Sonymen qatar, Qazaqstan dástúrli túrde Lıtvanyń jıyrma iri saýda seriktesteriniń qataryna kiredi», - dedi vıtse-premer.