Qazaqstan men Qytaıdyń Syrtqy ister mınıstrleri kelissóz júrgizdi

NUR-SULTAN. QazAqparat – Qytaıdyń syrtqy ister mınıstri Van I jumys saparymen Qazaqstanda júr. Jumys sapary aıasynda Qytaıdyń Memlekettik keńesiniń múshesi ári syrtqy ister mınıstri V. Idi Qazaqstan Respýblıkasynyń Prezıdenti Qasym-Jomart Toqaev pen Qazaqstannyń Tuńǵysh Prezıdenti – Elbasy Nursultan Nazarbaev qabyldady. Kezdesýlerdiń barysynda ártúrli salada ózara tıimdi ekijaqty yntymaqtastyqty damytý máseleleri talqylandy. Bul týraly QazAqparat tilshisi QR SІM-niń Telegram-arnasyna silteme jasap habarlaıdy.

Sonymen qatar Qazaqstan Respýblıkasynyń Syrtqy ister mınıstri Muhtar Tileýberdi men QHR syrtqy ister mınıstri Van Idiń kelissózi ótti. Onyń barysynda taraptar joǵary jáne bıik deńgeıdegi qol jetkizilgen kelisimderge beıildilik tanytty. Sondaı-aq eki el arasyndaǵy saıası, saýda-ekonomıkalyq jáne mádenı-gýmanıtarlyq ózara seriktestikti damytý máseleleri boıynsha oılarymen bólisti. Odan bólek, «Nurly jol» baǵdarlamasy men «Bir beldeý, bir jol» bastamasyn úndestirý, sonymen birge BUU, ShYU, AÓІSShK jáne «Ortalyq Azııa – Qytaı» dıalog alańdary aıasynda ózara yntymaqtastyqty kúsheıtý máselesi týraly sóz qozǵaldy.

SІM basshylary COVID-19 jahandyq pandemııasyna birlese qarsy turý máselesinde ózara yqpaldasa áreket etýdi jandandyryp, osy jyldyń sońyna deıin vıdeokonferentsııa baılanysy arqyly ekijaqty mańyzdy sharalardy ótkizýge kelisti.

Kelissózderdiń nátıjesi boıynsha mınıstrler qazaqstan-qytaı strategııalyq yntymaqtastyqtyń negizgi máseleleri boıynsha birqatar mańyzdy kelisimge qol jetkizdi.