Qazaqstan men Qytaıdyń saýda statıstıkasyndaǵy aıyrmashylyq sebebi ataldy

ASTANA. QazAqparat - QR Joǵary aýdıtorlyq palatasynyń múshesi Ardaq Teńgebaev Qytaımen aradaǵy ózara saýda statıstıkasy boıynsha aıyrmashylyq sebebin aıtty, dep habarlaıdy QazAqparat tilshisi.

Onyń aıtýynsha, atalǵan elmen ózara saýda statıstıkasynda eleýli aıyrmashylyq bar. Mundaı aıyrmashylyqqa áser etip otyrǵan birneshe sebep anyqtaldy.

«Oǵan ádistemelik negizder de sebep bolýy múmkin, ıaǵnı bul statıstıka eki elde ózgeshe qaralýy yqtımal. Qytaıdan ákelinetin taýarlar boıynsha bizdiń jaqtaǵy kedendik ákimshilendirýdiń tıisti deńgeıde bolmaýy óziniń áserin tıgizip otyr. Osy oraıda bul taýarlardyń kedendik qunyn tómendetip kórsetý, taýar sanatyn qate saralaý jáne basqa da sebepter baıqaldy. Eń negizgi sebep – ol kedendik qunnyń tómen baǵalaý. Eger salystyrmaly túrde aıtsaq, Qytaı statıstıkasy boıynsha aıaq kıim ortasha eseppen 10 dollar somasynda kelse, al bizdiń statıstıkada basqa málimetter bolýy múmkin. Buǵan kedendik ákimshilendirý tártibiniń tıisti deńgeıde bolmaýy yqpal etip otyr», - dedi A. Teńgebaev Senatta tilshiler suraǵyna jaýap bere otyryp.

Budan buryn habarlanǵandaı, Qazaqstan men Qytaıdyń taýar aınalymy 2022 jyldyń toǵyz aıynda 22,5%-ǵa ósip, 23,2 mlrd dollarǵa jetti.

Aıta keteıik, jaqynda Qytaıdan taýar tasyǵan kásipker zańsyz jolmen 4,2 mlrd teńge tabys tapqany anyqtaldy.