Qazaqstan men Qytaıdyń kedendik statıstıkasy nelikten eki bólek
«Iá, 2017 jyly Qytaı Halyq Respýblıkasymen aınaly statıstıkanyń ara-jigi 7 mlrd dollardy quraǵan edi (kedendik ákimshilik - avt.). Biz ótken jyldyń sońynda da, osy jyly da birneshe ret Qytaıǵa baryp, áriptesterimizben kezdestik. Álbette, nelikten osynshama aıyrmashylyq baryn izdedik. Eger 7 mlrd týraly aıtar bolsaq, bul soma shynynda da, óte aýqymdy san», - deıdi Qýat Rahymov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýyna qaraǵanda, kezdesý barysynda QR QM Memlekettik kirister komıtetiniń qyzmetkerleri qytaılyq taraptyń ádistemesin bilmek bolǵan.
«Bizdiń anyqtaǵanymyzdaı, olar (Qytaı tarapy - avt.) Qazaqstan aýmaǵy arqyly tasymaldaıtyn júkterdiń bárin, ıaǵnı Eýroodaq elderine, Reseıge, Belarýs elderine jiberiletin taýarlardyń bárine qatysty málimetterdi - Qazaqstanǵa jasalǵan eksport dep qaraıdy eken. Álbette, bul rette bizde eshqandaı kemshilik joq dep aıtyp otyrǵan joqpyn. Árıne, shyndyqqa saı kelmeıtin deklaratsııaǵa, baǵany qadaǵalaý turǵysynan suraqtar. Máselen, jyl basynan beri Qazaqstan-Qytaı shekarasyndaǵy taýarlarǵa mańyz berip kelemiz. Shekaradaǵy qadaǵalaý qyzmetin kúsheıttik. Kóptegen júkterdi tekserip jatyrmyz. Post-keńestik aýdıtke qatysty suraqtar týyndaǵan 60 kompanııany anyqtadyq», - deıdi ol.
Qýat Rahymov atap ótkendeı, 2019 jyldyń birinshi toqsanynda 1700 tonna taýardyń kúmándi deklaratsııalanǵany anyqtalǵan.
Eske sala ketsek, Elbasy Nursultan Nazarbaev «Nur Otan» partııasynyń kezekti XVIII sezinde kedendik ákimshilikti qatań baqylaýǵa alýdy tapsyrǵan bolatyn.
«Máselen, kedendik ákimshilik boıynsha bizde bir málimet bar da, Qytaı tarapynda odan bólek ekinshi málimet aıtylyp jatady. Ol kórsetkishterdiń arasynda mıllıardtar jatyr. Eshkim eshteńe bilmeıdi. Surasań, qaıdaǵy bir bastyqtar kedendi ustap tur deıdi. Olardy ustap, qylmystyq jaýapkershilikke tartyńdar. Ol jaqtaǵy jumysty retke keltire otyryp, biz birneshe júz mlrd teńge ala alamyz. Sol sekildi, basqa bıýdjettik shyǵyndardy qysqartý kerek bolar. Memlekettik satylymǵa 4 trln teńge ketip jatyr. Bári de bir jerden berilýde. Osy baǵytta jumysty retteı bastap edik, qarajat túse bastady. Memlekettik satylymdy tolyǵymen básekeli ortaǵa berýimiz kerek. Qymbat ári jaısyz nysandardy qarjylandyrýdy qoıý kerek. Bıýdjetti qurar kezde «jobalyq-smetalyq qujatym bar, maǵan aqsha ber», - degen bolatyn Nursultan Nazarbaev.
Prezıdent óz sózinde Úkimet pen Qarjy mınıstrligine salyq ákimshiligin jaqsartý baǵytynda tapsyrma bergen edi.