Qazaqstan men Qytaıdyń áskerı saladaǵy yntymaqtastyǵy talqylandy

NUR-SULTAN. QazAqparat - QR Qorǵanys mınıstri Rýslan Jaqsylyqov pen elimizge resmı saparmen kelgen Qytaıdyń Qorǵanys mınıstri Veı Fenheniń ekijaqty kezdesýi ótti. Bul týraly QazAqparat QM silteme jasap habarlaıdy.

Taraptar kún tártibindegi ózekti jáne basymdyq berilgen ekijaqty máselelerdi talqylady. Atap aıtqanda, birlesken oqý-jattyǵýlardy ótkizý praktıkasyn jalǵastyrý, eki el áskerı qyzmetshileriniń dalalyq mashyqtan túrli jarystarǵa qatysýy, qarýly kúshter men áskerı-tehnıkalyq yntymaqtastyq úshin bilikti kadrlar daıarlaýdy uıymdastyrý týraly ýaǵdalastyqtarǵa qol jetkizildi.

Odan bólek, qorǵanys mınıstrleri bitimgershilik salasynda birlesken is-qımyldy jolǵa qoıý qajettigi jóninde ýaǵdalasty.

Qorǵanys vedomstvolarynyń basshylary eki jaqty formatta da, halyqaralyq uıymdar sheńberinde de Qazaqstan men Qytaı qarýly kúshteri arasyndaǵy ózara is-qımyl basymdyqtaryna joǵary baǵa berdi.

Sonymen qatar, Qazaqstan-qytaı áskerı yntymaqtastyǵyn nátıjeli damytýdyń áleýeti de atap ótildi.