Qazaqstan men Qytaı ultaralyq qatynastardy damytý máselesin talqylaıdy

ASTANA. QazAqparat – Qazaqstan men Qytaı ultaralyq qatynastardy damytý máselesin talqylaıdy. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«2023 jylǵy 14-15 qyrkúıekte Qytaı tarapynyń shaqyrýymen Premer-Mınıstrdiń birinshi orynbasary Roman Sklıardyń «Qytaı-Eýropa» júk poıyzdarynyń 1-shi yntymaqtastyq forýmyna bas qonaq retinde qatysý úshin Lıanıýngan qalasyna jumys sapary ótedi. Bul forýmǵa qytaı tarapynan Qazaqstan-Qytaı yntymaqtastyq komıtetiniń qytaı bóliminiń teń tóraǵasy, QHR Memlekettik keńesi Premer-Mınıstriniń orynbasary Dın Sıýesıan, sondaı-aq Qyrǵyzstan, Ózbekstan, Mońǵolııa, Serbııa, Majarstan jáne basqa da elderdiń beıindi mınıstrlikteriniń basshylary qatysady», - dedi ol vedomstvoda ótken brıfıngte.

Onyń aıtýynsha, sapar baǵdarlamasynda QHR Memlekettik keńesi Premer-Mınıstriniń orynbasary Dın Sıýesıanmen ekijaqty kezdesý kózdelgen. Onda saýda-ekonomıkalyq, ınvestıtsııalyq, kólik-tranzıttik salalaryndaǵy ekijaqty yntymaqtastyqtyń ózekti máseleleri talqylanady. Sonymen qatar jetekshi qytaılyq kompanııalarmen kezdesýler ótkizý jáne Lıanıýngan portyndaǵy Qazaqstan-Qytaı logıstıkalyq termınalyna barý josparlanyp otyr.

Al 17-19 qyrkúıekte Qytaı kommýnıstik partııasynyń birikken maıdan bólimi meńgerýshisiniń orynbasary, QHR Ulttar isteri jónindegi memlekettik komıtetiniń Tóraǵasy Pan ıÝe bastaǵan delegatsııa Qazaqstanǵa keledi.

«Bul sapar etnosaralyq qatynastardaǵy ekijaqty yntymaqtastyqty damytý turǵysynan mańyzdy sıpatqa ıe. Sapar barysynda Qazaqstan Respýblıkasynyń beıindi vedomstvolarynyń basshylarymen birqatar kezdesýler ótkizý josparlanǵan. Onda ultaralyq qatynastardy damytý jáne eki el arasynda tájirıbe almasý máseleleri talqylanady», - dedi Aıbek Smadııarov.