Qazaqstan men Qytaı sybaılas jemqorlyqpen birge kúresetin boldy
Kezdesý barysynda agenttik tóraǵasy qytaılyq áriptesin Qazaqstannyń sybaılas jemqorlyqqa qarsy saıasatynyń negizgi erejeleri, agenttik qyzmeti týraly habardar etti.
«Bıyl sáýirde Beıjińde bizdiń Tuńǵysh Prezıdent – Elbasy Nursultan Nazarbaev bastaǵan qazaqstandyq delegatsııa qatysqan «Bir beldeý – bir jol» ekinshi halyqaralyq yntymaqtastyq forýmy kóshbasshylarynyń dóńgelek ústeli ótkeni belgili. Ótken aptada Halyqaralyq sybaılas jemqorlyqqa qarsy akademııa Assambleıasynyń 8-shi otyrysyna Qytaı delegatsııasy da qatysty. Men Qytaı tártiptik baqylaý jáne qadaǵalaý akademııasynyń vıtse-prezıdenti Hý Tszınıan myrzamen jeke kezdestim. Bizdiń búgingi kezdesýimiz bizdiń mekemeler arasyndaǵy yntymaqtastyqty tabysty damytýǵa serpin beredi dep senemin», - dedi Alık Shpekbaev kezdesý barysynda.
Agenttik basshysynyń aıtýynsha, táýelsizdik jyldarynda Qazaqstanda úzdik halyqaralyq jáne otandyq tájirıbeni qoldanýǵa negizdelgen tıimdi zańnama qalyptasqan.
«Biz Memleket basshysyna tikeleı baǵynatyn táýelsiz quqyq qorǵaý organymyz. Bizdiń mıssııamyz: «Qazaqstan halqynyń ál-aýqaty úshin jemqorlyqty joıý». Agenttiktiń barlyq bastamalary naqtylanǵan, aıqyn qundylyqtar prızmasy arqyly júzege asyrylady. Bul – ádildik, parasattylyq jáne senim. Parasattylyq ıdeologııasy bizdiń qyzmettiń tujyrymdamalyq negizi bolyp aıqyndalǵan. Agenttiktiń negizgi mindetteri - sybaılas jemqorlyqqa qarsy is-qımyl boıynsha memlekettik saıasatty qalyptastyrý jáne iske asyrý, qoǵamda jemqorlyqqa qarsy mádenıetti nasıhattaý, jemqorlyq qylmystarynyń aldyn-alý, anyqtaý, áshkereleý jáne tergeý», - dedi ol.
Aıta keterligi, Qytaıdyń Memlekettik qadaǵalaý komıssııasy tergeý áreketterin júrgizý ókilettigine ıe. MQK-ǵa QHR sybaılas jemqorlyqqa qarsy kúres jónindegi baqylaý mınıstrligi men memlekettik basqarma kiredi. QHR Konstıtýtsııasyna engizilgen jańa ózgeristerge sáıkes, MQK organdary memlekettik bılikti bildiretin barlyq qyzmetkerlerdi qadaǵalaýdy júzege asyrýǵa ýákiletti.
Tıimdi áriptestikti ornatý maqsatynda Qazaqstan men Qytaı ókilderi sybaılas jemqorlyqqa qarsy qyzmeti yntymaqtastyq týraly memorandýmǵa qol qoıdy. Ol birlesken jobalardy iske asyrýdy jandandyrýǵa, aqparat almasýdy júzege asyrýǵa múmkindik beredi.
Sonymen qatar, kezdesý aıasynda agenttik qyzmetkerlerin QHR Tártiptik baqylaý jáne qadaǵalaý akademııasynda oqytý, sondaı-aq, atalǵan akademııanyń QR Prezıdenti janyndaǵy Memlekettik basqarý akademııasynyń yntymaqtastyǵy máseleleri talqylandy.