Qazaqstan men Qytaı saýda-sattyqty dollarsyz júrgizýdi kózdeıdi
Qytaı Halyq Respýblıkasynyń kommertsııa jónindegi vıtse-mınıstri Jen Hýnbınniń aıtýynsha, «Bir beldeý - bir jol» bastamasy aıasynda Qazaqstan arqyly Eýropaǵa jetkiziletin júkterdiń kólemi aıtarlyqtaı ósti. Osy ýaqytqa deıin ınfraqurylym, kadrlyq resýrstar, elektrondy saýda jáne taǵy basqa salalar boıynsha birqatar qujattarǵa qol qoıyldy.
«Qazirgi kezde biz ınvestııalardy qorǵaý týraly jańa kelisim boıynsha kelissózderdi bastadyq. Bes jyldyń ishinde ózara saýda aınalymy ósti. Qytaıdyń joǵary texnologııalyq taýarlary Qazaqstan naryǵyna shyqty. Al Qazaqstan astyq ımporttaýshylardyń tórttigine endi. Ótken jyly alǵash ret Qazaqstannyń tabıǵı gazy Qytaıǵa eksporttaldy. Biz energetıka, paıdaly qazbalar, xımııa ónerkásibi jáne taǵy basqa salalarda iri jobalardy qolǵa aldyq. Qazaqstan úshin Qytaı kommertsııalyq kredıtterdiń basty arnasyna aınaldy. Taraptar ekijaqty operatsııalardy ulttyq valıýtalarmen júrgizýdi qarastyryp jatyr», - dedi Astanadaǵy bıznes forýmda Jen Hýnbın.
Onyń aıtýynsha, búginde Qytaıdyń qarjy uıymdary «Astana» halyqaralyq qarjy ortalyǵynyń úlesine kirdi. Olardyń ınvestıtsııalary 29 mlrd dollardy qurap otyr.
Aıta keteıik, Astanadaǵy «Rıksos» qonaq úıinde qazaq-qytaı bıznes forýmy bastaldy. Atalǵan shara "Bir beldeý - bir jol" bastamasynyń bes jyldyǵyna arnalyp otyr. Búginde QHR osy bastamanyń boıynda ornalasqan 25 memleketpen tyǵyz qarym-qatynas ornatyp, ózara saýda-sattyqty 605 mlrd dollarǵa jetkizdi. Sonyń ishinde Qazaqstan men Qytaı arasyndaǵy saýda aınalymy 10 mlrd dollardy quraıdy.
QR Prezıdenti Nursultan Nazarbaev búgingi forým qatysýshylaryna óz quttyqtaýyn joldady. Qytaı Halyq Respýblıkasynyń tóraǵasy Sı Tszınpın da úndeý joldap, Qazaqstannyń Prezıdenti Nursultan Nazarbaevqa óz rızashylyǵyn bildirdi.