Qazaqstan men Qytaı mádenı, gýmanıtarlyq jáne ǵylymı baılanysty nyǵaıtýǵa ýaǵdalasty

ASTANA. QazAqparat - Prezıdentter Nursultan Nazarbaev pen Sı Tszınpın 2018 jyly 7 maýsymda jasaǵan birlesken málimdemesinde Qazaqstan men Qytaı halyqtary arasyndaǵy mádenı, gýmanıtarlyq jáne ǵylymı baılanys  nyǵaıtylatyndyǵy atap ótildi, dep habarlaıdy QR SІM baspasóz qyzmeti.

Qujatqa sáıkes,taraptar BAQ arasynda yntymaqtastyqty keńeıtýge, ǵalymdarmen akademııalyq almasýǵa yqpal etýge, ádebı shyǵarmalar men fılmderdi aýdarý salasyn kúsheıtýge, ádebı-kórkem toptardyń saparlaryn uıymdastyrýǵa kelisti. Al bilim, densaýlyq, sport, týrızm, jastar máselesinde iskerlik baılanystar jalǵasyn tabatyn bolady.

 «Taraptar «Jibek joly» mádenı mura sabaqtastyǵyn saqtaı otyryp, ózara tıimdi yqpaldastyqty nyǵaıta túsedi. Sondaı-aq ejelgi eskertkishterdi qalpyna keltirý, arhelogııalyq zertteý jumystaryn yntymaqtasa júrgizedi»,- dep atap ótilgen memleket basshylarynyń málimdemesinde.

Munymen qatar Qazaqstan men Qytaı ǵylymı-tehnıkalyq jáne aqparattyq tehnologııa salasyndaǵy yntymaqtastyq jobalary boıynsha jańa modelderdi zertteıdi, ǵylymı-zertteý mekemeleri jáne joǵary oqý orny arasynda iskerlik baılanystarǵa jaǵdaı týǵyzady.