Qazaqstan men Qytaı halqy bir-biriniń mádenıetin qurmetteıdi – Dımash CCTV13-ke suhbat berdi

ASTANA. QazAqparat – Dımash Qudaıbergen Qytaıdyń táýlik boıy aqparat taratatyn CCTV13 telearnasyna suhbat berdi. Bul týraly ánshiniń Eýrazııalyq fan-klýby áleýmettik jelidegi paraqshasynda jarııalady, dep habarlaıdy QazAqparat.

«QHR Tóraǵasy Sı Tszınpınmen kezdeskende biz meniń mýzykam týraly sóılestik. Ol daýsyma jáne ánderime joǵary baǵasyn berdi. Bul – men úshin joǵary mártebe. Qazaqstan men Qytaı halqy bir-biriniń mádenıetin qurmetteıdi. Qos el syılastyqpen birlese damı alady», - dep oı bólisedi ánshi suhbat barysynda.

Áńgime Dımash Qudaıbergenniń Qytaıdyń tanymal ártisterimen qatar osy eldegi jańa jyl merekesine arnalǵan festıvalde óner kórsetkeni týraly órbıdi. Oǵan qazaqstandyq ánshi Uly Jibek joly boıyndaǵy eldiń ókili retinde qatysqan.

«Men Kóktemgi festıvaldiń gala-qoıylymyna alǵash qatysqanymda 23 jasta edim, qazir 29-ǵa kelip qaldym. Sol kezdegi festıval áli esimde. Biz birneshe apta daıyndaldyq. CCTV mamandarynyń kásibıligin jáne túsirý tobynyń gala-qoıylym kórermenderi aldyndaǵy jaýapkershiligin kórdim», - deıdi Dımash.

Buǵan deıin habarlaǵanymyzdaı, Dımash Qudaıbergen Qytaıdyń CCTV ortalyq telearnasynda ótken «Spring gala festival 2023» efırine qatysty.

Foto: instagram.com/kudaibergenov.dimash