Qazaqstan men Qytaı bir-biriniń halyqaralyq arenadaǵy bastamalaryn qoldap keledi - Muhtar Tileýberdi
«Qytaı Halyq Respýblıkasy Memlekettik keńesiniń múshesi, Syrtqy ister mınıstri Qazaqstanǵa resmı saparmen kelgenin qýanyshpen qabyldaımyz. Jańa ǵana áriptesim mınıstr Van Imen ózara tıimdi ári paıdaly kelissózder ótkizdim. Kezdesýdiń qorytyndylary elderimizdiń ekijaqty qatynastaryna jańa serpin berip, dostyq baılanystardy odan ári nyǵaıtatyn jańa múmkindikterge negiz bolyp otyr. Qytaı Halyq Respýblıkasy Qazaqstan Respýblıkasynyń máńgi jan-jaqty strategııalyq áriptesi, sondaı-aq dostas memleket. Onyń ústine bul sapar eki el arasynda dıplomatııalyq qarym-qatynas ornaǵanyna 30 jyl tolýy aıasynda ótýde. Búgingi mańyzdy kezdesý Qytaı syrtqy saıası vedomstvosy basshysynyń 2020 jylǵy qyrkúıekten beri elimizge jasaǵan alǵashqy sapary», - dedi Muhtar Tileýberdi.
Onyń atap ótýinshe, Van I myrzamen Qazaqstan men Qytaı arasyndaǵy saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ózara is-qımyldyń búgingi ahýaly men odan ári damýynyń perspektıvalaryn talqylandy.
«Qazaqstan men Qytaı bir-biriniń halyqaralyq arenadaǵy bastamalary men kúsh-jigerin qoldap keledi. Bul ekijaqty jáne kópjaqty ózara is-qımyldy odan ári damytýǵa qolaıly jaǵdaı jasaıdy. Memleket basshylarymyz arasynda jaqyn jáne senimdi qarym-qatynas ornatylǵan jáne saıası dıalog joǵary deńgeıde ótedi», - dedi ol.