Qazaqstan men Qytaı arasyndaǵy taýar aınalymy alty aıda 672 myń tonnany qurady

BEIJІŃ.QazAqparat - Qytaıdyń «Qorǵas» temirjol stantsııasy arqyly Qazaqstanmen jasaǵan ımport-eksport kólemi 2017 jyldyń birinshi jartyjyldyǵynda 672 myń tonnany qurady. Bul týraly «Qorǵas» stantsııasy basqarmasynyń basshysy Ma Inon aıtty, dep habarlaıdy «QazAqparat» HAA tilshisi.

Ma Inon myrzanyń aıtýynsha, «Qorǵas» stantsııasy Qytaıdyń «Tszınhe-Inın-Qorǵas» temirjolyn Altynkól baǵytyndaǵy Qazaqstannyń temirjol jelisimen baılanystyrady. Stantsııanyń qurylysy 2012 jyly qolǵa alynǵan jáne ol jylyna 15 mıllıon tonna júk ótkize alady. Alǵashqyda stantsııanyń qurylysyna bólingen ınvestıtsııa kólemi 1,93 mıllıard ıýandy qurady. Osy kúni atalmysh baǵyta arqyly tasymaldanatyn júk kólemi arta túsýde.

«2013-2016 jyldar aralyǵynda Horgos stansasy arqyly Qazaqstan men Qytaı elderiniń arasynda eksport pen ımporttyń kólemi 1,35 mıllıon tonnaǵa jetti. Aǵymdaǵy jyldyń birinshi jartyjyldyǵynda bul kórsetkish 672 myń tonnany qurady. «Bir beldeý, bir jol» baǵdarlamasynyń arqasynda Qytaı eliniń Eýropamen, Ortalyq Azııanyń bes elimen saýda-ekonomıkalyq baılanysy nyǵaıa túsýde. Onyń ishinde Qazaqstan Respýblıkasynyń alar orny zor. Eki el arasynda kóliktik logıstıkany damytýǵa erekshe kóńil bólinýde», dedi Ma Inon.