Qazaqstan men Qytaı arasyndaǵy sý kelisimderiniń 25 paıyzy maquldandy

NUR-SULTAN. QazAqparat – Ekologııa, geologııa jáne tabıǵı resýrstar vıtse-mınıstri Serik Qojanııazov Qazaqstan men Qytaı arasyndaǵy transshekaralyq ózender máselesi boıynsha júrgizilip jatqan kelissózderdiń nátıjesi týraly málim etti, dep habarlaıdy QazAqparat tilshisi.

Ortalyq kommýnıkatsııalar qyzmetinde mınıstrlik ókiline transshekaralyq ózenderdiń máselesi týraly birneshe saýal qoıyldy. Sol saýaldarǵa jaýap bergen Serik Jumanııazov Qytaıdyń atalmysh máselede ózge eshbir eldermen kelissóz ústeline otyrmaǵanan eske saldy.

«Qytaı óz tarıhynda osy kúnge deıin transshekaralyq sý obektileri bar 18 eldiń eshqaısysymen sý bólý jóninde birde-bir halyqaralyq shart jasasqan joq. Reseı Federatsııasy, Úndistan, Pákistan, Aýǵanstan, Qyrǵyzstan, Tájikstan, Vetnam, Bangaldesh, Nepal, Soltústik Koreıa, Kambodja sııaqty elderdiń bir de bireýimen halyqaralyq kelisimge otyrmaǵan. 2013 jylǵy qyrkúıekte QHR tóraǵasy Sı Tszınpınniń Qazaqstanǵa memlekettik sapary barysynda Qazaqstan men Qytaı basshylary deńgeıinde qol jetkizilgen ýaǵdalastyqtardyń arqasynda 2015 jyldan bastap transshekaralyq ózender sýyn bólý týraly kelisim jobasyn ázirleý men kelisýdi bastaý týraly sheshim qabyldanǵan bolatyn», - dedi vıtse-mınıstr.

Osy kelisim negizinde eki jaqtyń mamandarynyń basyn qosqan Transshekaralyq ózenderdi paıdalaný jáne qorǵaý jónindegi Qazaqstan-Qytaı birlesken komıssııasy qurylǵan bolatyn. Vedomstvo ókiliniń aıtýynsha, búginde osy birlesken komıssııanyń 17 otyrysy ótipti.

«Transshekaralyq ózender sýyn bólý týraly kelisim jobasyn ázirleý jáne kelisý jumystary qazirgi pandemııaǵa qaramastan jalǵasyp jatyr. Kelisimdi maquldaý óte kúrdeli jumys ekenin aıtqym keledi. Ǵylymı zertteýler júrgizýdi qajet etedi. Bul jumysqa Geografııa jáne sý qaýipsizdigi ınstıtýtynyń joǵary bilikti mamandary tartylyp otyr. Tartylǵan sarapshylardyń ishinde Qazaq KSR-niń burynǵy Sý sharýashylyǵy mınıstri, Qazaqstannyń Sý resýrstary jónindegi memlekettik komıtetiniń alǵashqy tóraǵasy Narıman Qypshaqbaev, 2002-2009 jyldary Sý resýrstary komıteti tóraǵasynyń orynbasary bolǵan Ámirhan Kenshınov, 40 jyldyń eńbek ótili bar sý mamany Aleksandr Kalashnıkov, geografııa jáne sý qaýipsizdigi ınstıtýty dırektorynyń orynbasary Saıat Álimqulov sııaqty bilikti mamandar bar. Osy sarapshylardyń joǵary biliktiligi bizge aıtarlyqtaı nátıjelerge jetýge múmkindik berdi. Naqty aıtsaq, Transshekaralyq ózender sýyn bólý týraly kelisim jobasy mátininiń 25 paıyzy maquldandy», - dedi Serik Qojanııazov.