Qazaqstan men Qytaı arasynda saýda-sattyq qalaı júrip jatyr
«Koronavırýstyń ekonomıkaǵa tıgizetin yqpaly jaıly Úkimet basshysy búgin aıtyp ótti. Ekonomıkaǵa jaýapty adamdardyń bári bul máselemen aınalysyp jatyr. Shekteýge qatysty aıtarym, álbette ekonomıka máselesi óte mańyzdy. Qazirdiń ózinde Qytaı ekonomıkasy 1 paıyzǵa quldyrady degen málimet bar. Álemdik ekonomıkadaǵy Qytaıdyń úlesi 24 paıyz ekenin eskersek, bul ahýal kóptegen elge, onyń ishinde Qazaqstanǵa áser etpeı qoımaıdy. Áıtse de osynshalyqty ekonomıkalyq shyǵyndy eskergenimizben, búgingi tańda azamattardyń qaýipsizdigin birinshi orynǵa qoıamyz», - dedi Eraly Toǵjanov Úkimettiń baspasóz ortalyǵyndaǵy brıfıng barysynda.
Úkimet basshysynyń orynbasary dál qazir Qazaqstan men Qytaı arasynda temirjol arqyly baılanys baryn málim etti.
«Máselen, Dostyq beketinde mashınıske deıin tıisti sharalardy qabyldap jatyrmyz. Sol sebepti barlyq aldyn alý sharalary memlekettik shekaradan bastap júrgizilip jatqanyn aıtqym keledi. Júk tasymaly jaǵynan naqty sharalar qabyldanǵan. Máselen ótken táýlikte ǵana tek 10 avtokólik qana ótti. ıAǵnı, biz ary-beri qozǵalysty barynsha qysqartyp jatyrmyz. Álbette bul shekteýler bizdiń eldiń ekonomıkasyna, saýdasyna áser etip jatyr. Áıtse de túsinistik bolý kerek», - dedi ol.
Óz kezeginde Indýstrııa jáne ınfraqurylymdyq damý vıtse-mınıstri Berik Qamalıev ary-beri qatynap júrgen kólikterge qatysty mán-jaıdy túsindirdi.
«Kóbinese Qytaıǵa biz jaqtan avtokólik quraldary kiredi. Máselen aqpan aıynda 8-20 kólikten kirip júrdi. Olar shekaradan ary ótkennen keıin bar-joǵy 3 shaqyrym júredi de kedendik aýmaqtaǵy qoımalarǵa barady. Olar QHR polıtseılerimen birge júrip, júkti alyp, qaıta elge qaıtady. Ol jaqtan elge qaıtqan azamattarymyzdyń bári birden dárigerlerdiń baqylaýyna alynady. Al Qytaı jaqtan sońǵy bir kólik 17 aqpanda ǵana kelgen. Osydan keıin QHR tarapynan bizge avtokólikter kirgen joq», - dedi ol.