Qazaqstan men Qyrǵyzstan sýdıalardy birlesip daıyndaýǵa kelisti

ASTANA. QazAqparat - Búgin Qazaqstan men Qyrǵystannyń sot tóreligi salasyndaǵy oqý oryndary arasynda ózara yntymaqtastyq týraly memorandýmǵa qol qoıyldy. Atalǵan bilim berý uıymdary eki eldiń Joǵarǵy sottary janynda jumys isteıdi. Qazaqstanda akademııa bolsa, Qyrǵyzstanda joǵarǵy mektep retinde qyzmet atqarady, dep xabarlaıdy QazAqparat tilshisi.

Akademııanyń rektory Tólesh Qaýdyrovtyń aıtýynsha, memorandým aıasynda eki eldiń sýdıalary men sot qyzmetkerlerin oqytý, osy salada ózara tájirıbe almasý, oqý baǵdarlamalaryn birlesip ázirleý qarastyrylǵan. Osylaısha, eki oqý orny arasynda iskerlik baılanystardy kúsheıtip, sot tóreligin barynsha jetildirý kózdelip otyr.
«Shyny kerek, eki eldiń sot júıesi barynsha ádil ári ashyq bolýy qajet. Sonda bıznes te, ǵylym da, qarapaıym xalyq da óz quqyqtarynyń saqtalatynyna senimdi bolady. Al ádil sotqa senim bolsa, bári birdeı erkin áreket ete alady. Osyny sýdıalar men sot qyzmetkerleri jumysta emes, bilim alǵan oqý ornynan bastap jete túsinýi kerek. Halyqta jaqsy bir sóz bar, «Eki úıdiń arasyndaǵy jolǵa shóp óspesin». Sondyqtan Qazaqstan men Qyrǵyzstan arasyndaǵy jolǵa shóp óspesin, osy joldy shań baspasyn. Mamandar tájirıbe almasyp, bir-birimen tyǵyz aralasa bersin», - dedi Tólesh Qaýdyrov.

Aıta ketken jón, Qyrǵyzstan delegatsııasy Qazaqstanǵa jasap otyrǵan sapary aıasynda elimizdiń sot tóreligi salasyndaǵy tájirıbemen tanysyp úlgerdi. Olar akademııanyń jumysyn kórip, birqatar semınarlarǵa da qatysty. «Biz Qazaqstannyń Joǵarǵy sotynda bolyp, sýdıalarmen de kezdestik. Tipti, akademııa magıstranttarynyń spektaklin kórdik. Joǵarǵy sot janyndaǵy Axýaldyq ortalyqta da boldyq. Shyny kerek, osy salada Qazaqstan biraz jetistikterge jetti. Kórip-bilgenimizdi óz elimizde de iske asyrý qajet», - dep atap kórsetti Qyrǵyzstannyń sot tóreligi boıynsha Joǵary mektebiniń dırektory Raýshanaı Týrgýnbaeva.