Qazaqstan men Qyrǵyzstan shekarasynda óndiristik saýda-logıstıkalyq kesheni salynady

ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın men Qyrǵyz Respýblıkasynyń Ekonomıka jáne saýda mınıstri Danııar Amangeldıev Qazaqstan men Qyrǵyzstan shekarasynda óndiristik saýda-logıstıkalyq keshen qurý jáne retteý týraly kelisimge qol qoıdy. Qujat Astana halyqaralyq forýmy aıasynda rásimdeldi, dep habarlaıdy QazAqparat tilshisi.

Serik Jumanǵarınniń atap ótýinshe, atalǵan keshen eki eldi arasyndaǵy ekonomıkalyq qatynastardy nyǵaıtyp, memleketterdiń ekonomıkasynyń damýyna septigin tıgizetin bolady.

«Forým aıasynda álemdik mańyzy bar óte ózekti máseleler kóterildi. Búgin biz uzaq kútken oqıǵaǵa kýá boldyq. Qazir ǵana ekonomıkalyq jáne tatý kórshilik qatynastardy damytýǵa taǵy bir qadam jasaldy. Kelisim birneshe jyl daıyndalǵanyn, egjeı-tegjeıli pysyqtalyp, ınvestorlary anyqtalǵanyn atap ótkim keledi. Eki eldiń kóptegen memlekettik organy jumyldyryldy. Keshen jańa óndiristerdi, jumys oryndaryn ashýǵa, aýyl sharýashylyǵy jáne ónerkásip ónimderin óndirýge, sonymen qatar júkterdi odan ary tasymaldaý úshin úshin qajetti logıstıkalyq qyzmetterdi uıymdastyrýǵa septigin tıgizedi», - dedi Serik Jumanǵarın.

Qyrǵyz Ekonomıka jáne saýda mınıstriniń aıtýynsha, keshendi salý eki eldiń saýda-ekonomıkalyq baılanystaryna tyń serpin beredi.

«Óndiristik saýda-logıstıkalyq keshenniń arqasynda eki eldiń arasyndaǵy taýar aınalymy eki esege artatyndyǵyn atap ótkim keledi. Búginde ol 2 mlrd dollardy quraıdy», - dedi Danııar Amangeldıev.