Qazaqstan men Qyrǵyzstan shekarasy arasyndaǵy ótkizý pýnktteri aýysady - Parlament
11:24, 14 Qańtar 2016
ASTANA. QazAqparat - Búgin Parlament Senatynyń jalpy otyrysynda «2003 jylǵy 25 jeltoqsanyndaǵy Astana qalasynda qol qoıylǵan Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Memlekettik shekara arqyly ótkizý pýnktteri týraly kelisimge ózgerister engizý týraly hattamany ratıfıkatsııalaý týraly» QR Zańy qabyldandy. Hattamaǵa sáıkes, Qazaqstan men Qyrǵyzstan shekarasyndaǵy ótkizý pýnktterin aýystyrý máseleleri sheshimin tabady.
«Qoldanystaǵy kelisimdegi ótkizý pýnktteri naqty shekaradan jıyrma úsh shaqyrym jerde ornalasqan. Onda «Merke temirjoldyq» ótkizý pýnkti ornatylǵan. Osyǵan baılanysty ony «Shaldabar temirjoldyq» ótkizý pýnktine aýystyrý kózdeledi. Memlekettik shekaraǵa ótkizý pýnktteriniń tikeleı jaqyn ornalasýy shekarylyq baqylaýdy júzege asyrýdaǵy memlekettik shekaradan ótý syzbasyn ońaılatyp, qaýipsizdikti arttyrýǵa yqpal etedi», - dedi Investıtsııalar jáne damý mınıstri Áset Isekeshev.
Túıindeı aıtqanda, Qazaqstan men Qyrǵyzstan arasyndaǵy ótkizý pýnktteri Merke stantsııasynan Shaldabar stantsııasyna kóshiriletin bolady.
Parlament qabyldaǵan zań Memleket basshysynyń qol qoıýyna joldanady.