Qazaqstan men Qyrǵyzstan shekaralyq ókilderiniń qyzmet ýchaskeleri týraly hattama ratıfıkatsııalandy

ASTANA. QazAqparat – Memleket basshysy «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy shekaralyq ókilderdiń qyzmet ýchaskeleri týraly hattamany (karta 1:200 000) ratıfıkatsııalaý týraly» Qazaqstan Respýblıkasynyń Zańyna qol qoıdy. Bul týraly QazAqparat Aqordaǵa silteme jasap habarlaıdy.

Zańnyń mátini baspasózde jarııalanady.

Hattamanyń negizgi maqsaty – Qazaqstan Respýblıkasy men Qyrǵyz Respýblıkasynyń shekaralyq ókilderi óz fýnktsııalaryn oryndaýǵa jaýapty bolatyn memlekettik shekara ýchaskeleriniń aýmaqtyq shekterin aıqyndaý. Osy oraıda, 2019 jylǵy 20 mamyrda Bishkekte jasalǵan eki memleket arasyndaǵy hattamany qoldanysqa, zańdyq kúshine engizý eskerilgen.

Hattamaǵa sáıkes Qazaqstan Respýblıkasynyń Úkimeti men Qyrǵyz Respýblıkasynyń Úkimeti mynadaı ýchaskelerdi aıqyndady:

Qazaqstan Respýblıkasynyń jaǵynan – Almaty, Qordaı jáne Taraz ýchaskeleri, al Qyrǵyz Respýblıkasynyń jaǵynan – Ystyqkól, Shý jáne Talas ýchaskeleri.

Senator Ǵalıasqar Sarybaev atap ótkendeı, zańdy ratıfıkatsııalaý Qazaqstan men Qyrǵyzstan Respýblıkalarynyń memlekettik shekarasynda turaqtylyq pen yntymaqtastyqty qamtamasyz etýdi, ózara kelisim men senimdilikti arttyrýdy kózdeıdi.