Qazaqstan men Qyrǵyzstan shekara beketin jańǵyrtý týraly kelisimge qol qoıdy
Qazaqstan Prezıdenti Qasym-Jomart Toqaevtyń Qyrǵyz Respýblıkasyna jasaǵan memlekettik sapary aıasynda qos eldiń Úkimeti arasynda QR «Qarasý» jáne Qyrǵyz Respýblıkasynyń «Aq tilek» ótkizý beketteriniń aralyǵynda jańa kópirdiń qurylysy men qoldanystaǵy kópirdi rekonstrýktsııalaý boıynsha birlesken sharalar týraly kelisimge qol qoıyldy.
Kelisimge sáıkes, ótkizý beketin jańǵyrtý jumystary 2020 jyly Shý ózeni arqyly ótetin kópirdi qalpyna keltirý jónindegi jobalyq-smetalyq qujattamany ázirleý sharalarynan bastalmaq. Joba aıasynda júk jáne jeńil kólikterdiń qozǵalysyna arnalǵan jolaqtar sany arttyrylyp, kópirdiń ár elge tıesili jaqtarynda jaıaý júrginshiler ótpelderi salynady dep josparlanýda. Sondaı-aq, joldardy jóndeý, jaıaý júrginshilerge arnalǵan joldardy jaılastyrý jáne jaryqtandyrý nysandaryn ornatý jumystaryn qosa alǵanda, «Qarasý» ótkizý beketiniń kóliktik ınfraqurylymy qalpyna keltiriletin bolady. Jobany iske asyrý «Qarasý» beketiniń ótkizý qabilettiligin 2 ese arttyrýǵa múmkindik beredi. Bul óz kezeginde Qazaqstan men Qyrǵyzstan arasyndaǵy saýda kóleminiń ulǵaıýyna sebep bolyp, eki eldiń azamattary úshin qolaıly jaǵdaı jasaıdy. «Qarasý» beketiniń ótkizý qabileti - jylyna 400 myńǵa jýyq avtomobıl kóligi men 850 myńnan astam adamdy quraıdy. Josparǵa sáıkes jumystar 2021 jyly aıaqtalady.
Eske salaıyq, Qazaqstan men Qyrǵyzstan arasynda búgingi tańda 7 ótkizý beketi jumys isteıdi. Olar - «Qordaı», «Qarasý», «Sypataı batyr», «Aısha bıbi», «Kegen», jáne «Sarytóbe» ótkizý beketteri. Kelesi jyly «Besaǵash» ótkizý beketiniń jumysy qaıta jandanyp, «Kegen» ótkizý beketiniń jumys ýaqyty uzarady. Osylaısha, eki el arasyndaǵy shekaradan 8 beket arqyly ótýge bolady.
Sondaı-aq, qazaqstandyq taraptyń «Qordaı» ótkizý beketin rekonstrýktsııalaıtynyn da aıta ketý kerek. Merdiger uıym - «JolQurylys» JShS. Joba 2020 jyly aıaqtalady. Jańǵyrtý jumystarynan soń «Qordaı» beketiniń ótkizý qabileti - jylyna shamamen 9 mln adam men 900 myń avtomobıl bolmaq.