Qazaqstan men Qyrǵyzstan ózara Mádenı kúnderin uıymdastyrady

BІShKEK. QazAqparat – Qazaqstan men Qyrǵyzstan delegatsııalarynyń arasynda ótken kelissózder qorytyndysy boıynsha Qasym-Jomart Toqaev pen Sooronbaı Jeenbekov buqaralyq aqparat quraldary úshin birlesken málimdemede eki el arasyndaǵy mádenı baılanystar týraly aıtty, dep habarlaıdy QazAqparat tilshisi.

«Jyl saıyn mádenı-gýmanıtarlyq saladǵy yntymaqtastyǵymyz keńeıip keledi. Tarıhymyzda atalǵan sala mańyzdy baılanystyrýshy kópir boldy, ıaǵnı bizdiń baýyrlas halyqtarymyzdy jaqyndastyrýda sheshýshi ról oınady. Bul baılanystarymyz qazirgi kezde saqtalyp keledi», - dedi QR Prezıdenti Qasym-Jomart Toqaev.

Osy oraıda eki el arasynda mádenıet salasyna qatysty «dóńgelek ústel» otyrystary, kórmeler, aqyndardyń keshteri, zııaly qaýym ókilderiniń qatysýymen semınarlar turaqty ótkizilip turatynyn atap ótti.

«Bizge osy qarqyndy ary qaraı saqtap, osy saladaǵy yntymaqtastyqty jalǵastyrý kerek. Osy turǵyda aldaǵy ýaqytta elderimizdiń ózara Mádenı kúnderin uıymdastyrý usynyldy. Sońǵy ret mundaı shara alty jyl buryn ótkizilgen bolatyn. Búgingi kezdesý barysynda osyndaı ózara mádenı baılanystardy halyqtarymyz qalap otyrǵanyn baıqadyq», - dedi Qasym-Jomart Toqaev.