Qazaqstan men Qyrǵyzstan esepke alynbaǵan taýarlardy ákelýge jáne áketýge jol bermeýge kelisti

NUR-SULTAN. QazAqparat - Qazaqstan Respýblıkasy Premer-Mınıstriniń orynbasary – Saýda jáne ıntegratsııa mınıstri Baqyt Sultanov beınekonferentsııa rejıminde Qyrǵyz Respýblıkasy Mınıstrler Kabıneti Tóraǵasynyń Birinshi orynbasary Arzybek Qojoshevpen kelissózder júrgizdi, dep habarlaıdy QazAqparat.

QR Saýda jáne ıntegratsııa mınıstrligi baspasóz qyzmetiniń habarlaýynsha, kezdesý barysynda 2022 jylǵy 16 aqpanda Almaty qalasynda ótken Qazaqstan Respýblıkasy men Qyrǵyz Respýblıkasy arasyndaǵy saýda-ekonomıkalyq yntymaqtastyq jónindegi jumys tobynyń birinshi otyrysynyń hattamasyn oryndaý, atap aıtqanda, ózara júk tasymaly, onyń ishinde Qyrǵyz Respýblıkasynyń aýmaǵynan Qazaqstan Respýblıkasyna, Reseı Federatsııasyna jiberiletin jáne keri baǵyttaǵy júk avtokólik quraldarynyń ótýi týraly máseleler talqylandy.

Kezdesý qorytyndysy boıynsha taraptar eki el shekarasynda júk avtokólik quraldarynyń jınalýyna jol bermeý, esepke alynbaǵan taýarlardy ákelýge jáne áketýge jol bermeý boıynsha birlesken sharalar qabyldaý, sondaı-aq elektrondyq shot-faktýralar bolmaǵan jaǵdaıda avtokólik quraldaryn Qyrǵyz Respýblıkasynyń aýmaǵyna qaıtarý týraly birqatar ýaǵdalastyqtarǵa qol jetkizdi.

«Sonymen qatar, ózara júk tasymaldary salasynda týyndaıtyn problemalardy monıtorıngileý jáne jedel sheshý maqsatynda aı saıynǵy negizde osyndaı kelissózder júrgizý týraly sheshim qabyldandy»,-delingen habarlamada.