Qazaqstan men Qyrǵyz shekarasy halyqaralyq quqyqtyq deńgeıde bekitiledi
Eki el arasyndaǵy shekarany shegendeý týraly shartqa 2017 jylǵy 25 jeltoqsanda Astanada Qyrǵyz Respýblıkasy memleket basshysynyń Qazaqstanǵa resmı sapary sheńberinde Qazaqstan Prezıdenti Nursultan Nazarbaev jəne Qyrǵyz Prezıdenti Sooronbaı Jeenbekov qol qoıǵan.
QR Syrtqy ister mınıstriniń birinshi orynbasary Muhtar Tileýberdiniń aıtýynsha, sharttyń basty maqsaty - Qazaqstan men Qyrǵyzstan arasyndaǵy shekara syzyǵyn halyqaralyq quqyqtyq deńgeıde bekitý. «Shekarany shegendeý nátıjesinde memlekettik shekara syzyǵynyń uzyndyǵy 1257,07 shaqyrymdy qurady. Shekara syzyǵynda 1055 shekaralyq baǵana ornatyldy», - dedi mınıstr orynbasary. Onyń sózine qaraǵanda, atalǵan shart merzimsiz bolyp tabylady ári denonsatsııalaýǵa jatpaıdy. Al sharttyń kúshine enýi Qazaqstannyń memlekettik shekarasynyń halyqaralyq quqyqtyq rásimdeý protsesiniń aıaqtalýyna, Qyrǵyz Respýblıkasymen aýmaqtyq daýlardyń týyndaýynyń aldyn ala joıýǵa yqpal etedi.
«Qazaqstannyń syrtqy saıasatynyń negizgi baǵyttarynyń biri - elimizdiń ulttyq qaýipsizdigin qamtamasyz etýge múmkindik beretin memlekettik shekarany halyqaralyq quqyqtyq rásimdeý bolyp tabylady. Qalyptasqan geosaıası jaǵdaılarla shekarany shegendeýdiń múmkindiginshe jaqyn merzimde aıaqtaý memleketimizdiń aýmaqtyq tutastyǵyna, shekaranyń myzǵymastyǵyna jáne el egemendigine týdyrýy múmkin qaýip-qaterlerdi boldyrmaý úshin erekshe ózekti bolyp tabylady», - dedi Muhtar Tileýberdi.
Talqylaý barysynda depýtattar memlekettik shekarany shegendeýde Elbasynyń eńbegi eren ekenin atap ótti.
«Táýelsizdiktiń alǵashqy kúninen bastap Elbasy Nursultan Nazarbaev memlekettik shekaramyzdy quqyqtyq rásimdeý máselesine erekshe nazar aýdaryp keledi. Prezıdent óziniń «Táýelsizdik dáýiri» atty kitabynda: «Qazaqstannyń memlekettik shekarasyn saıası rastaýdyń, zań júzinde rásimdeýdiń jáne halyqaralyq dárejede moıyndalýynyń tarıhı mańyzyn aıtyp jetkizý múmkin emes. Dostar úshin ashyq, jat pıǵyldylar úshin jabyq memlekettik shekaranyń bekitilýi Qazaqstan Respýblıkasynyń egemendigin áıgileı tústi, uzaq merzimge turaqty beıbitshilikti qamtamasyz etti» dep atap ótken bolatyn. Memlekettik shekara BUU Jarǵysymen jáne Eýropadaǵy qaýipsizdik jáne yntymaqtastyq uıymynyń 1975 jylǵy qorytyndy aktisimen bekitilgen irgeli halyqaralyq quqyq qaǵıdattarynyń biri bolyp tabylady. Osyny eskersek, bul shart elimiz úshin erekshe mańyzdy», - dedi depýtat Qojahan Jabaǵıev.
Onyń sózine qaraǵanda, shart eki el arasyndaǵy ekijaqty yntymaqtastyqtyń 150-den astam qujattan turatyn shart-quqyqtyq bazasyn tolyqtyrady. Budan basqa, shartta memlekettik shekaranyń bastapqy jáne sońǵy túıisý núkteleri aıqyndalǵan.
«Bir sózben aıtqanda búgingi shart baýyrlas elder arasyndaǵy memlekettik shekarany halyqaralyq-quqyqtyq rásimdeý protsesin tolyǵymen aıaqtap, eki memlekettiń ózara syılastyǵy men egemendik, teńdigin jáne aýmaqtyq tutastyǵynyń berik negizin jasaıdy», - dedi depýtat.
Májilis maquldaǵan zań jobasy Senatqa joldanady.