Qazaqstan men Qyrǵyz Respýblıkasynyń ózara quqyqtyq kómek kórsetý shartyna ózgertýler engizildi
«Nazarlaryńyzǵa «1996 jylǵy 26 tamyzdaǵy Qazaqstan Respýblıkasy men Qyrǵyz Respýblıkasy arasyndaǵy azamattyq jáne qylmystyq ister jónindegi ózara quqyqtyq kómek kórsetý týraly shartqa ózgerister men tolyqtyrýlar engizý týraly hattamany ratıfıkatsııalaý týraly» Qazaqstan Respýblıkasynyń Zańy usynylyp otyr. Atalǵan shart 1997 jylǵy 30 maýsymdaǵy Qazaqstan Respýblıkasynyń Zańymen ratıfıkatsııalanǵan. Zań taraptar arasynda kórsetiletin azamattyq jáne qylmystyq ister jónindegi ózara quqyqtyq kómektiń tártibi men talaptaryn naqtylaýǵa jáne eki el azamattarynyń quqyqtaryn qorǵaýǵa baǵyttalǵan», - dedi senator Nurlan Beknazarov.
Sondaı-aq, Senat depýtaty shartqa engizilgen ózgerister men tolyqtyrýlardy atap berdi.
«Sharttyń tıisti babyna ózara quqyqtyq kómek kórsetý kezindegi qatynastardy júzege asyratyn quzyretti organdardy aıqyndaýdy jáne ol jaıynda dıplomatııalyq arnalar arqyly bir-birin habardar etýdi kózdeıtin ózgeris engizý. Eki memlekettiń qoldanystaǵy zańdaryndaǵy ózgeristerge baılanysty «sot sheshimderi» termınine qosymsha «sot buıryǵy» túsinigin engizý arqyly, sot sheshimderin oryndaý jáne bereshekterdi óndirip alý máselelerine qatysty rásimderdi retteý. Sondaı-aq, qylmystyq ister boıynsha quqyqtyq kómek kórsetý máselelerine qatysty quzyret Qazaqstan Respýblıkasynyń Bas prokýratýrasyna berilýine baılanysty sharttyń 28-babynyń kúshin joıý usynylyp otyr. Sonymen birge, ishki ister organdary quzyretiniń alyp tastalýyna baılanysty sharttyń tıisti babyna túzetýler engizilgen. Usynylyp otyrǵan ózgerister men tolyqtyrýlar sharttyń áreket etýi men quqyqtyq qatynastardy retteý múmkindikterin keńeıtedi», - deıdi ol.
Onyń aıtýynsha, resmı málimetterge sáıkes, 2022 jyly Qyrǵyzstan tarapynan quqyqtyq kómek kórsetý jóninde 373 suranys, bizdiń elimizden Qyrǵyzstan Respýblıkasynyń quzyrly organdaryna 304 suranys joldanǵan. Ekijaqty suranystardyń basym bóligi qanaǵattandyrylǵan.
«Sondyqtan da, atalǵan Shart azamattarǵa shetelde keıbir jaǵdaılar týyndaǵan kezde qajetti qujattaryn rásimdeý men qol jetkizý turǵysynan óte mańyzdy. «Qazaqstan Respýblıkasynyń halyqaralyq sharttary týraly» zańyna sáıkes hattama ratıfıkatsııalaýǵa jatady. Hattamany ratıfıkatsııalaý Qazaqstan men Qyrǵyzstan azamattaryna quqyqtyq kómek kórsetý salasyndaǵy ekijaqty yntymaqtastyqty odan ári nyǵaıtýǵa yqpal etedi. Senat komıtetterinen zań boıynsha eskertýler men usynystar kelip túsken joq», - dedi N. Beknazarov.
Talqylaý nátıjesinde Senat depýtattary bir aýyzdan Qazaqstan men Qyrǵyz Respýblıkasy arasyndaǵy azamattyq jáne qylmystyq ister jónindegi ózara quqyqtyq kómek kórsetý týraly shartqa ózgerister men tolyqtyrýlar engizý týraly hattamany qoldap, ratıfıkatsııalady.