Qazaqstan men Koreıa prezıdentteri kelissózder qorytyndysy boıynsha brıfıng ótkizdi
Jýrnalıster aldynda sóılegen sózinde Memleket basshysy Qasym-Jomart Toqaev Prezıdent Mýn Chje In bastaǵan ońtústik koreıalyq delegatsııany qonaqjaı qazaq jerinde qabyldaý úlken mártebe dep atap, bul memlekettik sapardyń eki eldiń strategııalyq qarym-qatynastarynyń on jyldyǵyna oraı ótýi ózindik mánge ıe ekenin aıtty.
Memleket basshysy Koreıa Respýblıkasyn saýda-ekonomıkalyq turǵydan Azııadaǵy eń iri ekinshi áriptes ekenine jáne jahandyq, aımaqtyq deńgeılerdegi ártúrli máseleler boıynsha yntymaqtastyqtyń joǵary deńgeıi qalyptasqanyna toqtaldy.
Qazaqstannyń álemdik ıadrolyq qarýǵa qarsy qozǵalystaǵy kóshbasshylyq rólin atap ótken Qasym-Jomart Toqaev Koreı túbegin denýklearızatsııalaý boıynsha Seýldiń qadamyn qoldaıtynyn aıtty. Prezıdenttiń pikirinshe, bul másele álem boıynsha qaýipsizdikti, turaqtylyq pen ornyqty damýdy qamtamasyz etý úshin óte mańyzdy.
- Biz koreıaralyq dıalogtyń damýyn jiti baqylap otyrmyz. Ońtústik Koreıa kóshbasshysy Mýn Chje In myrzanyń osy taǵdyrsheshti úderiste beıbitshilik pen múddeli taraptar arasyndaǵy kelissózderdi qaıta bastaýǵa baǵyttalǵan eńbegin joǵary baǵalaımyz, - dedi Qazaqstan Prezıdenti.
Memleket basshysy jýrnalısterge koreılik áriptesimen bolǵan kelissózder barysynda ekijaqty yntymaqtastyqtyń, halyqaralyq jáne óńirlik kún tártibindegi máseleler talqylanǵany jóninde aıtty.
Qasym-Jomart Toqaev eki el arasyndaǵy halyqaralyq yntymaqtastyq máselelerine arnaıy toqtaldy.
- Qazaqstan Ońtústik Koreıamen Birikken Ulttar Uıymy, Dúnıejúzilik saýda uıymy, «Ortalyq Azııa - Koreıa Respýblıkasy» forýmy jáne taǵy basqa qurylymdar aıasynda tyǵyz qarym-qatynas jasap otyr. Búgingi sapardan keıin bizdiń áriptestigimizdiń aıasy keńeıe túsetini sózsiz, - dedi Qazaqstan Prezıdenti.
Memleket basshysy saýda-ekonomıkalyq baılanystardy nyǵaıtýdyń mańyzdylyǵyn atap ótip, bul jumystardyń negizgi basymdyǵy Qazaqstan men Ońtústik Koreıa arasynda búgin qol qoıylǵan «Samal jel» jańa ekonomıkalyq yntymaqtastyq baǵdarlamasynda kórinis tapqanyn aıtty.
- Bizdiń elderimiz qazirdiń ózinde mashına jasaý, jol qurylysy jáne ınfraqurylym, aýyl sharýashylyǵy, qarjy sektory, densaýlyq saqtaý, aqparattyq jáne kommýnıkatsııalyq tehnologııa salalary boıynsha iri jobalardy júzege asyryp jatyr. Koreıa bıznesiniń yntymaqtastyqty jandandyrýǵa múddelilik tanytýy qýantady. Búginde 500-den astam birlesken kásiporyn Qazaqstan aýmaǵynda belsendi jumys isteıdi. Bulardyń qatary arta túsedi dep oılaımyn, - dedi Qasym-Jomart Toqaev.
Brıfıng barysynda Qazaqstan Prezıdenti elimizdiń Koreıalyq ınvestıtsııalyq tehnologııanyń engizilýine múddeliligin taǵy da naqtylady. Sondaı-aq, saýda-ekonomıkalyq jáne ǵylymı-tehnologııalyq yntymaqtastyq jónindegi úkimetaralyq komıssııanyń jumysyn jandandyrýǵa qatysty ýaǵdalastyq týraly jáne Nur-Sultan qalasynda Qazaqstan - Ońtústik Koreıa halyqaralyq IT-ortalyǵyn ashý jóninde aıtty.
Sonymen qatar, Memleket basshysy kólik-ınfraqurylym salý jónindegi yntymaqtastyqty tereńdetý máselesine erekshe nazar aýdaryp, «Nurly jol» ınfraqurylymdy damytý baǵdarlamasy men Ońtústik koreıalyq «Jańa soltústik saıasat» baǵdarlamasynyń strategııalyq basymdyqtarynyń jaqyndyǵyn aıtty.
- Biz birlesken ınfraqurylymdyq jobalardy qatar júzege asyra otyryp, kólik-tranzıt baǵdaryn damytý qajettigi jóninde ózara túsinistikke qol jetkizdik. Qytaıdyń Tynyq muhıty jaǵalaýyndaǵy Lıanıýngan portynda jumys istep turǵan qazaqstandyq termınaldyń múmkindigin koreı tarapynyń belsendi paıdalaný máseleleri týraly túsinistikke qol jetkizildi, - dedi Qasym-Jomart Toqaev.
Qazaqstan Prezıdenti ınvestıtsııalyq jobalardy júzege asyrýǵa qatysty shaǵyn jáne orta bıznestiń múmkindikterin yntalandyrý isindegi eki eldiń bankteri men qarjy ınstıtýttarynyń ózara yqpaldastyǵynyń mańyzdy ekenin atap ótti. Sondaı-aq, Ońtústik koreıalyq kásipkerlerdi Ortalyq Azııa naryǵyna shyǵý úshin «Astana» halyqaralyq qarjy ortalyǵynyń alańyn paıdalanýǵa shaqyrdy.
Qasym-Jomart Toqaev kelissózder barysynda bilim, densaýlyq salalary, Aral teńiziniń problemasyn sheshý, ekologııalyq apat aımaǵyndaǵy jaǵdaıdy ońaltý jáne parlamenttik dıplomatııa sııaqty birqatar máseleler boıynsha ýaǵdalastyqqa qol jetkizilgenin aıtty.
Sońynda Qazaqstan Prezıdenti Ońtústik koreıalyq delegatsııaǵa jáne Prezıdent Mýn Chje In myrzaǵa mazmundy kelissózder úshin rızashylyǵyn jetkizip, bul sapar Qazaqstan men Koreıanyń arasyndaǵy dostyq pen ózara senimge, áriptestikke negizdelgen yntymaqtastyń odan ári damýyna tyń serpin beretinine senim bildirdi.
***
Memlekettik sapar qorytyndysy boıynsha mynadaı qujattarǵa qol qoıyldy:
1. Qazaqstan Respýblıkasy men Koreıa Respýblıkasynyń birlesken málimdemesi;
2. Qazaqstan Respýblıkasy men Koreıa Respýblıkasy arasyndaǵy Sottalǵan adamdardy berý týraly shart;
3. Qazaqstan Respýblıkasy men Koreıa Respýblıkasynyń «Samal jel» jańarǵan ekonomıkalyq yntymaqtastyq baǵdarlamasy;
4. Qazaqstan Respýblıkasynyń Tsıfrlyq damý, qorǵanys jáne aeroǵarysh ónerkásibi mınıstrligi men Koreıa Respýblıkasynyń Ǵylym jáne aqparattyq-kommýnıkatıvtik tehnologııalar mınıstrligi arasyndaǵy Tórtinshi ónerkásip revolıýtsııasy jónindegi memorandým;
5. Qazaqstan Respýblıkasynyń Tsıfrlyq damý, qorǵanys jáne aeroǵarysh ónerkásibi mınıstrligi men Koreıa Respýblıkasynyń Ǵylym jáne aqparattyq-kommýnıkatıvtik tehnologııalar mınıstrligi arasyndaǵy Birlesken Halyqaralyq ІT ortalyǵyn qurý jónindegi nıettestik týraly hattama;
6. Qazaqstan Respýblıkasynyń Tsıfrlyq damý, qorǵanys jáne aeroǵarysh ónerkásibi mınıstrligi men Koreıa Respýblıkasynyń Ǵylym jáne aqparattyq-kommýnıkatıvtik tehnologııalar mınıstrligi arasyndaǵy Ǵarysh keńistigin beıbit maqsatta birlese zertteý jáne paıdalaný salasynda ózara túsinistik týraly memorandým;
7. Qazaqstan Respýblıkasynyń Densaýlyq saqtaý mınıstrligi men Koreıa Respýblıkasynyń Densaýlyq saqtaý jáne áleýmettik qamsyzdandyrý mınıstrligi arasyndaǵy Densaýlyq salasynda «Samal jel» baǵdarlamasyn júzege asyrý jónindegi jospar;
8. Qazaqstan Respýblıkasy Qarjy mınıstrliginiń Memlekettik kiris komıteti men Koreıa Respýblıkasynyń Keden qyzmeti arasyndaǵy ýákiletti ekonomıkalyq operatorlardy moıyndaý jónindegi ózara túsinistik týraly memorandým.