Qazaqstan men Qytaı dárigerleri medıtsınada jasandy ıntellekt qoldanylýyn talqylady

<p>ALMATY. KAZINFORM &ndash;&nbsp; Qytaıdyń Shyńjań medıtsınalyq ýnıversıtetiniń 6-aýrýhanasy men Tszılın ýnıversıtetiniń 2-aýrýhanasynyń ortoped-travmatolog-dárigerleriniń delegatsııasy tájirıbe almasý maqsatynda Almaty №4 qalalyq klınıkalyq aýrýhanasynda boldy.</p>

Eki el arasynda densaýlyq saqtaý salasyndaǵy yntymaqtastyqty tereńdetý maqsatynda ortopedııa salasynda 10 mamannan turatyn Qytaı delegatsııasy akademııalyq almasý formatynda paneldik sessııalar ótkizdi. Ǵylymı taldaý Almaty №4 qalalyq klınıkalyq aýrýhanasy bazasynda ótti. 

Foto: Almaty qalasynyń Qoǵamdyq densaýlyq saqtaý basqarmasy

«470 tósek-orynǵa eseptelgen aýrýhana Travmatologııa jáne ortopedııa aımaqtyq ortalyǵyn damytýǵa bet burdy. Ortalyq quramyna travmatologııalyq kómektiń tolyq tsıkli boıynsha 11 mamandandyrylǵan qurylymdyq bólimshe kiredi. Jasandy ıntellektiniń medıtsınaǵa engizilýi úlken býyndy aýystyrýda robot kómegimen jasalatyn otany jasaý arqyly úlken serpilis boldy. №4 qalalyq klınıkalyq aýrýhana bul tájirıbeni Qazaqstanda birinshi bolyp qoldandy», – dedi №4 qalalyq klınıkalyq aýrýhananyń dırektory Birjan Dosmaıylov.

Otandyq travmatologııa úshin súıek aqaýyn qalpyna keltirý úshin 3D formatynda basyp shyǵarylǵan tıtan qorytpasynan jasalǵan ımplantty zertteý jáne klınıkalyq qoldaný ózekti bolady. Bul Almaty men Qytaı travmatologtary arasyndaǵy akademııalyq yntymaqtastyqty damytýdaǵy negizgi máseleniń birine aınaldy.

Foto: Almaty qalasynyń Qoǵamdyq densaýlyq saqtaý basqarmasy

Qytaıdan kelgen dárigerlerdiń sapary travmatologııadaǵy medıtsınalyq qyzmettiń sapasyn arttyrý, tájirıbe almasý jáne medıtsına qyzmetkerleriniń biliktiligin arttyrý maqsatynda uıymdastyryldy. Almaty men Qytaıdaǵy klınıkalardyń basshylyǵy akademııalyq jáne praktıkalyq tájirıbe almasý maqsatynda uzaq merzimdi turaqty qarym-qatynas ornatýǵa kelisti.