Qazaqstan men Qytaı arasyndaǵy saýda baılanysy jańa qarqyn alady
QR Saýda jáne ıntegratsııa mınıstri Arman Shaqqalıev óz sózinde eki el prezıdenti ózara taýar aınalymyn 40 mıllıard AQSh dollaryna deıin ulǵaıtý jóninde qysqa merzimdi mindet qoıǵanyn atap ótti. Bul rette, ótken jyldyń qorytyndysy boıynsha Qazaqstannyń saýda seriktesteriniń arasynda Qytaı Halyq Respýblıkasy birinshi orynǵa shyqqan.
«2023 jyly Qazaqstan men Qytaı Halyq Respýblıkasy arasyndaǵy ózara saýda kólemi 31,5 mıllıard AQSh dollaryn quraıtyn rekordtyq kórsetkishke jetti. Qazaqstandyq ónimniń Qytaıǵa eksporty 12,6 paıyzǵa ósip, 14,7 mıllıard dollardy qurady. Import 50,5 paıyzǵa ósip, 16,8 mıllıard AQSh dollarǵa jetti. Qytaımen ózara baılanys álemdegi Qazaqstan úshin turaqty progress pen saýda-ınvestıtsııalyq áleýetti iske asyrýdyń uzaq merzimdi faktory bolyp otyr», - dedi A.Shaqqalıev.
Belgili bolǵandaı, byltyr Qytaı naryǵyna erkin eksporttalatyn Qazaqstannyń agroónimder tizbesi keńeıtilgen.
«Biz belsendi jumysty Qytaıdyń eń iri úsh provıntsııasynyń quramyna kiretin Sychýan provıntsııasynan bastadyq. Búginde Qazaqstan men provıntsııa arasyndaǵy saýda shamamen 230 mıllıon dollardy quraıdy. Onyń ishinde Qazaqstan 45 mıllıon dollarǵa ónim eksporttaıdy. Qyryqtan astam qazaqstandyq kompanııalardyń qatysýymen ótken saýda mıssııasy Qytaı naryǵyna suranys pen qazaqstandyq ónimniń eksporttyq áleýetiniń aýqymyn kórsetti. Atalǵan provıntsııa otandyq maı ónimderiniń, astyq ónimderiniń, sýsyndardyń, kondıterlik ónimderdiń jáne taǵy da basqa taýarlardyń úlken kólemin satyp alýǵa daıyn», - dedi mınıstr.