Qazaqstan men Qytaı arasyndaǵy agroónerkásip kesheni óniminiń aınalymy bıylǵy І toqsanynda 6%-ǵa artty

<p>ASTANA. KAZINFORM - Qazaqstan Respýblıkasynyń Premer-Mınıstri Oljas Bektenovtiń Qytaı Halyq Respýblıkasy Memlekettik keńesi Premeriniń orynbasary Lıý Gochjýnmen kezdesýi barysynda ekijaqty saýda-ınvestıtsııalyq yntymaqtastyqtyń serpindi damý qarqyny atap ótildi jáne eki el ekonomıkasyn birlesip jańǵyrtý máseleleri talqylandy.</p>

QR Úkimeti baspasóz qyzmetiniń habarlaýynsha, Prezıdent Qasym-Jomart Toqaev pen QHR tóraǵasy Sı Tszınpın úkimetter aldyna taýar aınalymyn $100 mlrd-qa deıin jetkizý mindetin qoıdy.

Aýyl sharýashylyǵy salasyndaǵy ózara is-qımyldy arttyrý perspektıvalary qaraldy. Bir jyl ishinde AÓK óniminiń taýar aınalymy 1,7 esege ósip, osy jyldyń І toqsanynda bul kórsetkish taǵy 6%-ǵa artty. Bul rette qazaqstandyq aýyl sharýashylyǵy taýarlarynyń Qytaıǵa eksporty bir jyl ishinde 84%-ǵa ósti.

Oljas Bektenov Qazaqstannyń Qytaı naryǵyna organıkalyq jáne ekologııalyq taza aýyl sharýashylyǵy ónimderin jetkizý kólemin arttyrýǵa daıyn ekendigin atap ótti. Buǵan Qytaı tarapynan qazaqstandyq et jáne qus ónimderin ákelýge qoıylǵan shekteýlerdiń birtindep alynyp tastalýy oń serpin beredi. AÓK salasynda tereń óńdeý boıynsha birlesken jobalardy qurý basym baǵyt retinde belgilendi.

Lıý Gochjýn QHR-dyń jasandy ıntellekt, elektrondy kommertsııa, spýtnıktik baılanys jáne «jasyl» energetıkany damytý salasyndaǵy yntymaqtastyqty arttyrýǵa degen nıetin jetkizdi.

Talqylaý barysynda tranzıttik-kólik salasyndaǵy yntymaqtastyqqa, jańa serpindi ınvestıtsııalyq jobalar arqyly ındýstrııalyq-ınvestıtsııalyq ózara is-qımyldy keńeıtýge (búgingi tańda jalpy somasy $14,5 mlrd bolatyn 45 birlesken joba iske asyrylýda), sondaı-aq óńiraralyq ári mádenı-gýmanıtarlyq qatynastarǵa nazar aýdaryldy. «Qazaqstannyń Qytaıdaǵy týrızm jyly» aıasyndaǵy is-sharalar eki eldiń týrıstik áleýetiniń arta túsýine yqpal etpek.

Qazaqstan-Qytaı úkimetaralyq kelissózderi eki memleket basshylary arasynda qol jetkizilgen barlyq ýaǵdalastyqtardy júzege asyrý úshin salalyq deńgeıde jalǵasýda.