Qazaqstan men Qytaı arasyndaǵy agronerkásip ónimderiniń saýda aınalymy 12%-ǵa artqan

<p>ASTANA. KAZINFORM - Qazaqstannyń Aýyl sharýashylyǵy mınıstri Aıdarbek Saparov Qytaı Halyq Respýblıkasynyń Damý jáne reformalaý memlekettik komıtetiniń ekonomıka jáne saýda departamentiniń dırektory Van Tszıantszıýnmen kezdesti.</p>

Aıdarbek Saparov aýyl sharýashylyǵy salasyndaǵy yntymaqtastyq Qazaqstan men Qytaı arasyndaǵy qarym-qatynastyń mańyzdy bóligi ekenin atap ótti.

2023 jyldyń qorytyndysy boıynsha AÓK ónimderiniń saýda aınalymy 1,7 ese ósip, 1,3 mlrd. dollardan asty. 2024 jyldyń qańtar-maýsym aılarynda Qazaqstan men Qytaı arasyndaǵy AÓK ónimderiniń saýda aınalymy 648,1 mln. AQSh dollaryn qurady, bul 2023 jyldyń sáıkes kezeńimen salystyrǵanda 12% -ǵa kóp, onyń ishinde eksport - 460 mln. AQSh dollary, ımport - 188 mln. AQSh dollary.

«Qytaı naryǵy Qazaqstannyń aýyl sharýashylyǵy ónimderin, ásirese, dándi daqyldardy eksporttaý úshin óte qyzyqty. Eki eldiń basshylarynyń kelisimi boıynsha dándi daqyldardyń eksport kólemin 2 mln tonnaǵa deıin ulǵaıtý týraly tapsyrma bar. Biz 3 mln tonna dándi daqyl jetkizýge daıynbyz jáne jalpy alǵanda bul baǵyttaǵy eki jaqty tıimdi yntymaqtastyq úshin barlyq jaǵdaıdy jasaýǵa daıynbyz», - dedi mınıstr.

Óz kezeginde Van Tszıantszıýn Qazaqstanǵa kelgen delegatsııanyń negizgi maqsaty Qazaqstan men Qytaı arasyndaǵy bıdaı saýdasy máseleleri boıynsha potentsıaldy paıdalaný týraly kelissózder júrgizý ekenin atap ótti.

«Qazaqstan strategııalyq seriktes jáne dándi daqyldardyń iri jetkizýshisi. Biz ımport kólemin anyqtaýdy josparlap otyrmyz jáne jetkizilimder turaqty negizde júrgizilsin dep tileımiz», - dedi Van Tszıantszıýn.

Taraptar Qazaqstan-Qytaı bıdaı saýdasy yntymaqtastyǵyn damytý, logıstıka máselelerin talqylady.

Qosymsha aıta ketý kerek, qazirgi ýaqytta Qazaqstan Qytaı naryǵyna 28 túrli ósimdik sharýashylyǵy jáne mal sharýashylyǵy ónimderin eksporttaý týraly hattamalarǵa qol qoıǵan.

Sonymen qatar, Qytaıǵa eksporttaý quqyǵy bar kásiporyndar tizilimine barlyǵy 1990 qazaqstandyq eksporttaýshy kásiporyn, onyń ishinde 1948 ósimdik sharýashylyǵy ónimderin óndiretin kásiporyn jáne 42 mal sharýashylyǵy ónimderin óndiretin kásiporyn kiredi.

Osyǵan deıin Qazaqstanda Qytaıdyń kedeılikti azaıtý tájirıbesi qoldanylatyny týraly jazdyq.