Qazaqstan men Qytaı arasynda transshekaralyq ózenderde sý bólý kelisimi jasalmaq
«Tujyrymdamada memleketaralyq sý qatynastaryn damytý úshin Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Transshekaralyq sý obektilerin birlesip basqarý jáne paıdalaný týraly, sondaı-aq Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy transshekaralyq ózenderde sý bólý týraly kelisimderge qol qoıý kózdelgen. Halyqaralyq sý yntymaqtastyǵynyń mańyzdy quramdas bóligi - Ortalyq Azııanyń sý-energetıkalyq yntymaqtastyǵy tetigin ázirleý», - dedi mınıstr.
Onyń atap ótýinshe, transshekaralyq sý obektilerin paıdalaný jáne qorǵaý jónindegi kelissózder toby músheleriniń quzyretin kúsheıtý, sondaı-aq arnaıy departament qurý josparlanǵan.
«Aıta ketý kerek, «Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııany ratıfıkatsııalaý týraly» Zańynyń jobasy Májiliste qaralyp, Senat qaraýyna engizildi. Konventsııa transshekaralyq ózender men kólderdi jáne olarmen baılanysty jerasty sýlaryn búkil álemde teń quqyqty jáne turaqty basqarýǵa yqpal etetin jahandyq quqyqtyq mehanızm bolyp sanalady. Qazirgi ýaqytta Konventsııanyń qatysýshysy - 37 memleket. Qazaqstanmen kórshiles elderdiń ishinde tek Ózbekstan Respýblıkasy ǵana konventsııaǵa múshe», – dedi ol.