Qazaqstan men Qyrǵyzstan taýar aınalymyn 2 mlrd dollarǵa deıin arttyrýdy kózdep otyr

<p>ASTANA. KAZINFORM &ndash; QR Qarjy mınıstri Mádı Takıev Qyrǵyzstanǵa baryp, Qyrǵyzstannyń Ekonomıka jáne kommertsııa mınıstri Danııar Amangeldıevpen ekijaqty kezdesý ótkizdi. Іs-sharaǵa Qazaqstan Respýblıkasynyń Qyrǵyz Respýblıkasyndaǵy Tótenshe jáne Ókiletti Elshisi Rápil Joshybaev ta qatysty. Taraptar 2024 jylǵy sáýirde Astanada Qazaqstan men Qyrǵyzstan Prezıdentteri qol qoıǵan &laquo;Odaqtastyq qatynastardy tereńdetý jáne keńeıtý týraly shartty&raquo; jáne &laquo;Investıtsııalardy kótermeleý jáne ózara qorǵaý týraly kelisimdi&raquo; iske asyrýdy talqylady. Bul týraly vedomstvonyń baspasóz qyzmeti málim etti.&nbsp;</p>

Mádı Takıev Qazaqstan Qyrǵyz Respýblıkasymen kópjosparly yntymaqtastyqty odan ári tereńdetýge umtylatynyn atap ótti. Birlesken kúsh-jigerdiń arqasynda 2023 jyly ózara saýda kólemi 1,5 mlrd AQSh dollaryna jetti. Bul kórsetkishti 2 mlrd dollarǵa jetkizý josparlanyp otyr.

«Meniń oıymsha, Prezıdentter qol qoıǵan qujattar Qazaqstan-Qyrǵyz qatynastarynyń damýyna jańa serpin beredi. Búgingi tańda buǵan barlyq deńgeıdegi belsendi jáne senimdi saıası dıalog yqpal etedi. Qıyn geosaıası jaǵdaılarǵa qaramastan, eki memleket keıbir baǵyttarda saýda qatynastaryn saqtap, nyǵaıtty. Biz, qyrǵyz tarapy sııaqty, jaqyn arada taýar aınalymyn 2 mlrd dollarǵa deıin jetkizý boıynsha sharalar qabyldap jatyrmyz», - dep atap ótti QR qarjy mınıstri.

Mádı Takıev «Qordaı» jáne «Qarasý» ótkizý pýnktteriniń, sondaı-aq qoldanystaǵy aqparattyq júıelerdiń jumysyn tekserdi.

Vedomstvo basshysyna shekarany kesip ótý kezinde baqylaý júrgizý protsesteri kórsetildi, kólik quraldarymen shekarany kesip ótý algorıtmi aıqyn kórsetildi.

Táýligine orta eseppen «Qarasý» ótkizý pýnkti arqyly 500-ge jýyq júk mashınasy, «Qordaı» arqyly - 300 mashına (5 tonnaǵa deıin) ótedi. Shekaradan ótý ýaqyty shamamen 25-30 mınýtty quraıdy.

Sondaı-aq, mınıstr aqparattyq júıelerdiń fýnktsıonaldyǵymen, atap aıtqanda, taýarlardy ótkizý kezinde yqtımal buzýshylyqtardy anyqtaýǵa múmkindik beretin táýekelderdi basqarýdyń avtomattandyrylǵan júıesimen tanysty.

Jalpy, memlekettik kirister komıteti EAEO elderimen barlyq shekarada taýarlardyń erkin qozǵalysyn qamtamasyz etti, ótkizý pýnktterinde baqylaý sharalary EAEO týraly sharttyń erejelerine sáıkes júrgiziledi.