Qazaqstan men Qyrǵyzstan arasyndaǵy saýda aınalymy 2 mlrd dollarǵa jetýi kerek - Premer
Bıznes ókilderi eki kún boıy iskerlik áriptestiktiń praktıkalyq máselelerin, al óńirler – ekonomıkalyq jáne áleýmettik damýdyń, agroónerkásiptik kooperatsııanyń jáne sý-energetıkalyq yntymaqtastyqtyń ózekti taqyryptaryn talqylaıdy.
🇰🇿🇰🇬 Qyrǵyzstan elimizdiń mańyzdy saýda seriktesi.
Sońǵy jyldary ózara saýda turaqty túrde ósý qarqynyn kórsetip keledi.
2021 jyldyń ózinde-aq taýar aınalymyn $1 mlrd-qa kóterý maqsatyna qol jetkizildi, al 2022 jyldyń qorytyndysyna sáıkes bul kórsetkish taǵy 19%-ǵa artty.
«Búgingi tańda aldymyzda budan da aýqymdy maqsat – saýda kólemin $2 mlrd-qa jetkizý tur. Ol úshin bizde barlyq múmkindikter bar. Biz olardy belsendi túrde paıdalanýymyz qajet», — dedi Álıhan Smaıylov.
Bul rette eki el arasynda tıimdi ınvestıtsııalyq ózara is-qımyl jolǵa qoıylǵan.
2005 jyldan beri qazaqstandyq kompanııalar Qyrǵyzstan ekonomıkasyna shamamen $1,3 mlrd ınvestıtsııa saldy.
«Qazaqstanda 3,5 myń birlesken kásiporyn tabysty jumys istep keledi, ótken jyldan beri olardyń qataryna 200-ge jýyq jańa kompanııa qosyldy. Bizdiń ınvestıtsııalyq yntymaqtastyǵymyzdyń múmkindikteri áldeqaıda keń ekeni sózsiz jáne biz birlesken jobalardy odan ári júzege asyrýǵa múddelimiz», — dedi Premer-Mınıstr.
Óziniń kirispe sózinde Qyrǵyzstan Mınıstrler Kabınetiniń tóraǵasy – Prezıdent Ákimshiliginiń basshysy Aqylbek Japarov Qazaqstan men Qyrǵyzstandy kóp ǵasyrlyq berik dostyq pen baýyrlastyq, ortaq tarıh, mádenıet jáne rýhanı qundylyqtarǵa negizdelgen tatý kórshilik qatynastar baılanystyratynyn atap ótti.
«Forým ózara tıimdi jańa jobalar men bastamalarmen erekshelenip, ekonomıkalyq, saýda jáne ınvestıtsııalyq baılanystardy nyǵaıtýǵa, elderimizdiń óńirleri arasyndaǵy iskerlik jáne mádenı-gýmanıtarlyq baılanystardy keńeıtýge serpin beretinine senimdimin», — dedi ol.
Kelesi kezekte eki eldiń Úkimet basshylary Qazaqstan-Qyrǵyzstan úkimetaralyq keńesiniń 11-shi otyrysy hattamasyna, al Shymkent jáne Osh qalalary, Aqtóbe jáne Jalal-Abad oblystary arasynda baýyrlastyq baılanystar ornatý týraly memorandýmdarǵa qol qoıdy.
Sonymen qatar forýmnyń eki kúniniń qorytyndysyna sáıkes qus etin, medıtsınalyq jáne kondıterlik ónimderdi, keshendi mıkrotyńaıtqyshtardy, ammofosty, natrıı tsıanıdin, áktas pen taqtatastardy jetkizýdi, saýda jáne deldaldyq qyzmetter kórsetýdi, sondaı-aq jeńil ónerkásip pen bank salasyndaǵy bastamalardy iske asyrýdy kózdeıtin $65 mln-nan astam soma kólemindegi birqatar kommertsııalyq qujattarǵa qol qoıyldy.