Qazaqstan men Qyrǵyzstan arasynda odaqtastyq qatynasty tereńdetý týraly shartqa qol qoıyldy
Atap aıtqanda Qazaqstan Prezıdenti Qasym-Jomart Toqaev pen Qyrǵyzstan Prezıdenti Sadyr Japarov «Qazaqstan Respýblıkasy men Qyrǵyz Respýblıkasy arasyndaǵy Odaqtastyq qatynastardy tereńdetý jáne keńeıtý týraly shartqa» jáne «Qazaqstan Respýblıkasynyń jáne Qyrǵyz Respýblıkasynyń Joǵary memleketaralyq keńesiniń altynshy otyrysynyń sheshimine» qol qoıdy.
QR Premer-Mınıstriniń orynbasary — Syrtqy ister mınıstri Murat Nurtileý men Qyrǵyzstannyń Ekonomıka jáne kommertsııa mınıstri Danııar Amangeldıev «QR Úkimeti men Qyrǵyzstan Mınıstrler kabıneti arasyndaǵy Investıtsııalardy kótermeleý jáne ózara qorǵaý týraly» kelisimge qol qoıdy.
Budan bólek, «2003 jylǵy 25 jeltoqsandaǵy Qazaqstan Úkimeti men Qyrǵyz Úkimeti arasyndaǵy memlekettik shekara arqyly ótkizý pýnkteri týraly» kelisimge ózgeris engizý jónindegi» hattama, sondaı-aq qazaq-qyrǵyz memlekettik shekarasynda avtomobıl ótkizý pýnkterin damytý jónindegi is-sharalar jospary bekitildi.
Munymen qosa, QR Tsıfrlyq damý, ınnovatsııalar jáne aeroǵarysh ónerkásibi mınıstrligi men Qyrǵyzstannyń Mınıstrler kabıneti janyndaǵy jeke derekterdi qorǵaý jónindegi memlekettik agenttigi arasynda ózara túsinistik týraly memorandým jasaldy.
Sonymen qatar, QR Ónerkásip jáne qurylys mınıstrligi men Qyrǵyzstannyń Mınıstrler kabıneti janyndaǵy Sáýlet, qurylys jáne turǵyn úı-kommýnaldyq sharýashylyq memlekettik agenttigi arasyndaǵy Ózara túsinistik ári yntymaqtastyqtyq týraly memorandýmǵa qol qoıyldy.
Budan buryn habarlanǵandaı, búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy.
Qazaqstan Prezıdentiniń aıtýynsha, Sadyr Japarovtyń Astanaǵa sapary aıasynda tarıhı kelisimge qol qoıylady.
Memleket basshysy Joǵary memleketaralyq keńes qazaq-qyrǵyz qarym-qatynastaryna erekshe serpin beretinin aıtty.