Qazaqstan men Kıpr bir-birine sottalǵan adamdardy berýge ýaǵdalasty

<p>ASTANA. KAZINFORM - Búgin Astanada Kıpr Syrtqy ister mınıstriniń Qazaqstanǵa resmı sapary aıasynda Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimge qol qoıý rásimi ótti.</p>

Kelisimge Qazaqstannyń Bas Prokýrory Berik Asylov pen Kıprdiń Syrtqy ister mınıstri Konstantınos Kombos qol qoıdy.

Bul halyqaralyq qujat qazaqstandyq azamattarǵa Kıprde jasaǵan qylmystary úshin bas bostandyǵynan aıyrýǵa sottalǵan jaǵdaıda taǵaıyndalǵan jazalaryn óz elimizde óteýge múmkindik beredi.

Bul óz kezeginde sottalǵandardy olardyń azamattyq qatystylyǵy qoǵamynda ońaltý jáne yqpaldastyrý úshin qolaıly jaǵdaılar jasaıdy.

Foto: QR Bas prokýratýrasy

Kıprdiń azamattary da Qazaqstanda sottalǵan jaǵdaıda osyndaı múmkindikke ıe bolady.

Mundaı túrdegi halyqaralyq kelisimderdi jasasý Qazaqstan Konstıtýtsııasynyń 11-babynyń talaptarymen kózdelgen, oǵan sáıkes memleket óziniń odan tys jerlerde júrgen azamattaryn qorǵaýǵa jáne olarǵa qamqorlyq jasaýǵa kepildik beredi.

Esterińizge sala keteıik, 2022 jyldyń qazan aıynda Qazaqstan Kıpr tarapymen qylmystyq ister boıynsha ózara quqyqtyq kómek týraly jáne adamdardy ustap berý týraly sharttar jasasqan bolatyn.

Kıpr Qazaqstanda qylmysqa qarsy kúres, zańdylyq pen quqyqtyq tártipti qamtamasyz etý, sondaı-aq azamattardyń negizgi quqyqtary men bostandyqtaryn qorǵaý salasyndaǵy yntymaqtastyq úshin barlyq qajetti halyqaralyq-quqyqtyq negiz qalyptasqan kezekti eýropalyq eli bolǵanyn atap ótken jón.