Qazaqstan men Kıpr arasynda qosarlanǵan salyqty boldyrmaý týraly qujat maquldandy

NUR-SULTAN. QazAqparat – Parlament Májilisiniń jalpy otyrysynda «Qazaqstan Úkimeti men Kıpr Úkimeti arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne oǵan Hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Osyndaı halyqaralyq sharttar sheteldik ınvestorlarǵa kepildik jasap, salyq salý quqyǵyn eki memleket arasynda ádiletti bólisýge múmkindik beredi. Konventsııa kelesi maqsattardy kózdeıdi: birinshiden, aldaǵy ýaqytta salyqtyń barlyq túrleri boıynsha aqparat almasýdy qalyptastyryp, salyq qyzmetteri arasyndaǵy yntymaqtastyqty nyǵaıtý; ekinshiden, rezıdenttikti dáleldeıtin eki memlekette birdeı qoldanylatyn tártipti belgileý; úshinshiden, eki el quzyretti organdar arasyndaǵy salyqtyq daýlardy sheshý úshin quqyqtyq negizdi qalyptastyrý.

«Eki el arasyndaǵy týar aınalymy sońǵy 10 jylda 440 mln dollarǵa jetti. 2016 jyly jalpy saýda aınalymy 7 mln dollardy ǵana quraǵan bolatyn. 2019 jyldyń 9 aıynda Qazaqstan men Kıpr arasyndaǵy ózara saýda kólemi edáýir ulǵaıyp, 30 mln dollardy qurady. Onyń ishinde eksport 28 mln, ımport 2 mln dollar deńgeıinde. Taýar aınalymynyń kóbeıýi Qazaqstannyń munaı ónimderin eksportqa kóptep shyǵarýyna baılanysty», - dedi QR Premer-Mınıstriniń birinshi orynbasary-Qarjy mınıstri Álıhan Smaıylov.

Qazaqstannan atalǵan elge eksporttaıtyn ónimder arasynda kómir, munaı ónimderi, alıýmınıı jáne azyq-túlik ónimderi qamtylǵan. Al ımport qurylymynda kóbinese farmatsevtik, parfıýmerlik, kosmetıkalyq zattar engen.