Qazaqstan men Qatar áskerı yntymaqtastyqty nyǵaıtady - zań

<p>ASTANA. KAZINFORM &mdash; Búgin Májilistiń jalpy otyrysynda &laquo;Qazaqstan Respýblıkasynyń Úkimeti men Qatar Memleketiniń Úkimeti arasyndaǵy áskerı yntymaqtastyq týraly kelisimdi ratıfıkatsııalaý týraly&raquo; Zańy qabyldandy.</p>

«Kelisimge 2023 jylǵy 12 jeltoqsanda Dohada eki eldiń qorǵanys vedomstvosynyń basshylary qol qoıdy. Qatar bizdiń elimizdiń sol óńirdegi mańyzdy saıası jáne ekonomıkalyq seriktesi sanalady. Munymen qosa, áskerı yntymaqtastyq sııaqty perspektıvaly baǵyttar bar. Kelisimdi ratıfıkatsııalaý taraptarǵa áskerı bilim berý men ǵylym, áskerı medıtsına, beıbitshilikti qoldaý jónindegi operatsııalar, jaýyngerlik daıarlyq baılanystaryn, sondaı-aq kelisilgen salalarda áskerı yntymaqtastyqty júzege asyrý múmkindigin beredi», - dedi QR Qorǵanys mınıstriniń orynbasary Darhan Ahmedıev.

Onyń aıtýynsha, Qazaqstannyń halyqaralyq sharttar týraly zańyna sáıkes atalǵan kelisim ratıfıkatsııalanýy tıis. Atalǵan zańdy qabyldaý teris áleýmettik-ekonomıkalyq jáne quqyqtyq saldarǵa ákep soqpaıdy.

Aıta keteıik, bıyl jazda Qazaqstan men Ázerbaıjannyń qorǵanys mınıstrleri áskerı yntymaqtastyq týraly kelisimge qol qoıdy.