Qazaqstan men Katar arasyndaǵy taýar aınalymy 2 mln dollarǵa jýyqtady

NUR-SULTAN. QazAqparat – Katar Qazaqstan úshin ýaqyt synynan ótken senimdi seriktes. Bul týraly búgin Qazaqstan-Katar joǵary deńgeıdegi birlesken komıssııasynyń 5-otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Katar Memleketin Taıaý Shyǵystaǵy negizgi seriktesterdiń biri retinde qarastyramyz. Tolyqtaı alǵanda, elderimizdiń arasyndaǵy dıplomatııalyq qarym-qatynastyń 27 jyly ishinde ózara senimge negizdelgen syndarly dıalog ornattyq. Katar Qazaqstan úshin ýaqyt synynan ótken dos ári senimdi seriktes. Katardyń Qazaqstanda áleýmettik nysandar salýdaǵy qaıyrymdylyq qalaýyna zor rızashylyqpen qaraımyz. Katar taraby Almaty oblysynda perzenthana salý úshin qarjy bólý týraly sheshim qabyldady. 2018 jyly Katar damý qorynyń qarjylaı qatysýymen Nur-Sultan qalasynda mektep-lıtseı qurylysy sátti aıaqtaldy. Kúni keshe ǵana bul mektepke sheıh Tamım ben Hamad ál-Tanıdiń esimi berildi», - dedi Rýslan Dálenov.

Onyń atap ótýinshe, Qazaqstan men Katar arasyndaǵy saıası ári ınvestıtsııalyq ózara is-qımyldyń oń qarqyny aıasynda eki eldiń bir-birimen taýar aınalymy shamamen 2 mln dollarǵa jýyqtap otyr. Aldaǵy ýaqytta bul kórsetkishti arttyra túsýge eki el de kúsh salmaq. Bul rette Doha men Nur-Sultan jáne Almaty qalalary arasynda tikeleı jolaýshylar jáne júk reısteriniń osy jyldyń naýryz aıynyń sońynda ashylýy septigin tıgizedi.

«Buǵan qosa, ınvestıtsııa, qarjy, energetıka, aýyl sharýashylyǵy, ǵylym jáne ózge salalardaǵy yntymaqtastyqty kúsheıtý ekijaqty taýar aınalymyn arttyrý úshin jańa perspektıvalar men múmkinshilikterge jol ashady. Biz qazaqstandyq-katarlyq kópjosparly dıalogty nyǵatýǵa jáne odan ary keńeıtýge bar kúsh-jigerimizdi jumsaýǵa daıynbyz», - dedi mınıstr.

Otyrysqa Katar memleketiniń Saýda jáne ındýstrııa mınıstri Alı ben Ahmed ál-Kývarı bastaǵan delegatsııasy qatysty.